რუსეთის ჩრდილო-დასავლეთში, ლომონოსოვის რაიონის სასამართლომ აქტივისტი ანდრეი ბოროვიკოვი "პორნოგრაფიის გავრცელების" ბრალდებით 29 აპრილს დამნაშავედ სცნო და პატიმრობის სახით 2 წელი და ექვსი თვე მიესაჯა.

რადიო თავისუფლება ევროპის ინფორმაციით, ადრეი ბოროვიკოვს 2014 წელს რუსულ სოციალურ ქსელში VKontakte გერმანული რუკჯგუფის Rammstein-ის ვიდეოკლიპის გაზიარების გამო ექვსი წლის შემდეგ, 2020 წელს წარუდგინეს ბრალი.

ბოროვიკოვმა პირად გვერდზე გააზიარა ცნობილი ბენდის 2009 წელს გამოსული სიმღერის Pussy ვიდეოკლიპი.

რამდენიმე დღის წინ გამართულ სასამართლო მოსმენაზე გამომძიებელმა განაცხადა, რომ ეს ვიდეო შესწავლისას "ორზე მეტ ადამიანს" არ უნახავს და ისიც მხოლოდ "სექსოლოგიური და კულტურული დაკვირვებისთვის", რათა ექსპერტებს დაედგინათ, რომ კლიპი ნამდვილად "პორნოგრაფიული ბუნების" იყო და "არ შეიცავდა ხელოვნების ღირებულებას".

ადრეი ბოროვიკოვი რუსეთის ერთ-ერთ მთავარ ოპოზიციონერთან, ალექსეი ნავალნისთანაა დაკავშირებული და ბევრი თვლის, რომ რუსულმა მართლმსაჯულებამ სწორედ ამის გამო გამოუტანა მას განაჩენი. მაგალითად, Amnesty International-მა აღნიშნული შემთხვევა "სრულ აბსურდად" შეაფასა:

ანდრეი ბოროვიკოვი

"ცხადია, რომ ის თავისი აქტივიზმისთმის დასაჯეს და არა – მუსიკალური გემოვნების გამო. ბოროვიკოვის სამართლებრივი დევნა სამართლიანობის დაცინვაა", — განაცხადა ნატალია ზვიაგინამ, Amnesty International-ის მოსკოვის ოფისის ხელმძღვანელმა.

ნატალია ზვიაგინამ ხაზი გაუსვა იმასაც, რომ რუსეთის ხელისუფლება "პორნოგრაფიას" ხშირად იყენებს კრიტიკულად განწყობილი ოპონენტების დევნისთვის: მაგალითად, იმავე ბრალდებითი ფემინისტი აქტივისტი იულია ცვეტკოვა ქალის შიშველი სხეულების დახატვის გამო სასამართლოზე წარსდგა.

აღსანიშნავია, რომ ადრეი ბოროვიკოვის საქმეს Rammstein-ის გიტარისტი, რიჩარდ კრუსპეც გამოეხმაურა და ინსტაგრამის პირად გვერდზე მწუხარება გამოხატა აღნიშნული შემთხვევის გამო:

"ძალიან ვწუხვარ, რომ ბოროვიკოვს პატიმრობა მიესაჯა. შოკისმომგვრელია აღნიშნული ბრალდების გამო სასჯელის სიმკაცრე. Rammstein ყოველთვის მხარს უჭერდა ხელოვნების თავისუფლებას, როგორც ყველა ადამიანის არსებითი უფლების გარანტიას", — წერს მუსიკოსი.

ეს პირველი შემთხვევა არაა, როცა Rammstein-ის კლიპის გამო ვიღაც დაისაჯა: იმავე Pussy-ის კლიპის გაზიარების გამო ბელარუსში 2019 წელს კაცი პორნოგრაფიის გავრცელების ბრალდებით დასაჯეს. მანამდე კი 2010 წელს ქვეყანაში როკჯგუფის კონცერტის ჩატარებას აპროტესტებდნენ, რადგან მიიჩნევდნენ, რომ ბენდი "ჰომოსექსუალობის, მაზოხიზმის, ძალადობის, ბოროტებისა და ვულგარიზმის ღია პროპაგანდას ეწევა".