თბილისის საქალაქო სასამართლომ აქტივისტს გიორგი მუმლაძეს საპატიმრო უზრუნველყოფით 3 000-ლარიანი გირაო შეუფარდა.

"დადგინდა გირაო 3 000 ლარის ოდენობით, რომლის გადახდის შემთხვევაში გიორგი მუმლაძე გათავისუფლდება აღკვეთის ღონისძიების სახით შეფარდებული საპატიმრო გირაოსაგან. აღსანიშნავია, რომ სასამართლო ძალიან იშვიათად აკეთებს ამას პრაქტიკაში. 50%-ის გადახდის შემთხვევაში, გიორგი მუმლაძე დატოვებს პენიტენციურ დაწესებულებას", — განაცხადა ადვოკატმა.

წინასასამართლო სხდომა ჩაინიშნა პირველ ივნისს 11 საათზე.

14 აპრილს ქართული ოცნების ოფისთან აქციის დროს ერთი აქტივისტი, გიორგი მუმლაძე დააკავეს. შინაგან საქმეთა სამინისტროს ცნობით, მას პოლიციის თანამშრომლებისთვის წინააღმდეგობის გაწევა ედება ბრალად. დანაშაული 2-დან 5 წლამდე ვადით თავისუფლების აღკვეთას ითვალისწინებს. მუმლაძის დაკავების გასაპროტესტებლად სამოქალაქო აქტივისტები შინაგან საქმეთა სამინისტროსთან მივიდნენ. ისინი შინაგან საქმეთა მინისტრთან შეხვედრას მოითხოვდნენ. აქტივისტების განცხადებით, პოლიციელმა გიორგი მუმლაძეზე ფიზიკურად იძალადა.