გაერთიანებული ერების განათლების, მეცნიერებისა და კულტურის ორგანიზაციის (UNESCO) ინიციატივით, ყოველწლიურად მსოფლიოს ერთ-ერთი ქალაქი მსოფლიოს წიგნის დედაქალაქი ხდება. 2019 წლის 8 ოქტომბერს იუნესკომ გადაწყვიტა, რომ ეს სტატუსი 2021 წლისთვის საქართველოს დედაქალაქისთვის მიენიჭებინა.

"2021 წლის წიგნის მსოფლიო დედაქალაქის" სტატუსი თბილისს 23 აპრილიდან მიენიჭება და ზუსტად 1 წლის განმავლობაში გაგრძელდება. ღონისძიების ფარგლებში მწერალთა სახლი ოთხი მიმართულებით იმუშავებს:

  • სამუზეუმო;
  • საგამომცემლო;
  • სარეზიდენციო;
  • ლიტერატურული ფესტივალი.

წლების წინ, ღონისძიებას დამატებით მნიშვნელობას ანიჭებდა ასობით ათასი ვიზიტორი, რომლებიც ქვეყნებს ამ მოვლენის გამო სტუმრობდნენ, თუმცა, უცნობია, პანდემიის ფარგლებში მიიღებს თუ არა თბილისი ვიზიტორებს.

ბოლო რამდენიმე დღეა საკოორდინაციო საბჭოს წევრები, მთავრობის წარმომადგენლები და ქვეყნის მთავარი ინფექციონისტები ქვეყანაში მესამე ტალღის საშიშროებაზე საუბრობენ. თავის მხრივ, მათი განცხადებები ეხება შესაძლო შეზღუდვებს.

7 აპრილს ინფექციური საავადმყოფოს დირექტორმა, თენგიზ ცერცვაძემ განაცხადა, რომ მესამე ტალღა საქართველოში ჯერ არ არის, თუმცა მისი "აჩრდილი მოჩანს" ევროპის ქვეყნებიდან, სადაც კორონავირუსის შემთხვევების ისტორიული მაქსიმუმები ფიქსირდება.

World Book Capital (წიგნის მსოფლიო დედაქალაქი) ფართომასშტაბიანი პროექტია, რომელიც 2002 წელს, UNESCO-ს გენერალური კონფერენციის გადაწყვეტილებით დაარსდა. ის მიზნად ისახავს წიგნისა და კითხვის პოპულარიზაციას, ხელს უწყობს წიგნის ინდუსტრიისა და მასთან დაკავშირებული ყველა სფეროს განვითარებას, თანამედროვე ავტორების, მთარგმნელების, ბიბლიოთეკების, გამომცემლების ხელშეწყობას.

იუნესკომ წიგნის მსოფლიო დედაქალაქის ფართომასშტაბიანი პროექტი 2002 წელს დაიწყო, ხოლო პირველი დედაქალაქი ალექსანდრია გახდა.

ამავე თემაზე: