საგარეო საქმეთა მინისტრის, დავით ზალკალიანის განცხადებით, საერთაშორისო პარტნიორებისგან არანაირ სანქციებს არ ელოდება. ასე უპასუხს მან ჟურნალისტების კითხვებს, მთავრობის ადმინისტრაციაში გამართულ ბრიფინგზე.

საქართველოში არსებული პოლიტიკური კრიზისი საერთაშორისო პარტნიორების ყურადღების ცენტრში არაერთხელ მოექცა. ისინი აღნიშნავენ, რომ ოპოზიციის პარლამენტში არშესვლა და ოპოზიციის ლიდერების დაკავება რუსეთის ინტერესებში შედის. პარტნიორები მოუწოდებენ ქვეყანას აღმოფხვრას კრიზისი, რაშიც პასუხისმგებლობას ორივე მხარეს, განსაკუთრებით კი მმართველ გუნდს აკისრებენ.

გარდა ამისა, სენატის სხდომაზე სენატორმა ჯიმ რიშმა აღნიშნა, რომ საქართველოს მხარდაჭერა ვერ იქნება უპირობო და თუ პროგრესი არ გამოჩნდა, ფინანსური მხარდაჭერა ასე ვერ გაგრძელდება. ოპოზიციაში ამბობენ, რომ შესაძლებელია საქართველოს სანქციები დაუწესდეს.

ბრიფინგზე ზალკალიანს ჰკითხეს სენატში საქართველოს საკითხზე გამართულ განხილვასა და ევროპული საბჭოს პრეზიდენტის წარმომაგენლის დაბრუნებაზე. მან კიდევ ერთხელ აღნიშნა, რომ მმართველ გუნდს ბევრი შეთავაზება და დათმობა აქვს, ოპოზიციას კი ჰგონია, რომ მოლაპარაკებებზე მისვლა, უკვე დათმობაა.