თებერვალში მეგან მარკლის პირადი წერილების გასაჯაროების გამო დაწყებული სასამართლო დავა სასექსის ჰერცოგინიის სასარგებლოდ დასრულდა. 2019 წელს ბრიტანულმა ტაბლოიდმა, Mail on Sunday-მ მეგან მარკლის მამისადმი, ტომას მარკლისადმი მიწერილი წერილი გამოაქვეყნა. წერილის გასაჯაროების შემდეგ მეგანმა გამოცემას სასამართლოში უჩივლა.

მეგან მარკლმა სასამართლო ხარჯების, £1,5 მილიონის ($2 092 410), აქიდან წინასწარ £750 000-ის ($1 046 205) ანაზღაურება მოითხოვა. ხარჯების ანაზღაურების გარდა, მეგან მარკლი გაზეთის პირველ გვერდზე ბოდიშის წერილის გამოქვეყნებასა და სასამართლოს ბრძანებით, ტაბლოიდის მიერ წერილის ყველა ასლისა და მის შესახებ გაკეთებული ჩანაწერების გადმოცემასა და განადგურებას ითხოვს. სასამართლომ, ამ ეტაპზე მეგანს წინასწარ £450 000-ის ($627 723) მოთხოვნის უფლება მიანიჭა, თუმცა სრული თანხა მოგვიანებით განისაზღვრება.

მოწინააღმდეგე მხარის წარმომადგენელმა აღნიშნა, რომ მოსარჩელის მიერ დასახელებული თანხა გაწეულ რეალურ ხარჯებზე მეტი იყო. მეგან მარკლის ადვოკატმა კი ყურადღება იმ ფაქტზე გაამახვილა, რომ მოპასუხეს სადავო სტატიები Mail Online-დან ჯერ კიდევ არ წაუშლია, ამასთანავე, მოპასუხემ არც წერილის ასლები დააბრუნა. ეს ყველაფერი კი მეგან მარკლის პირადი ინფორმაციის უკანონოდ გამოყენების სამომავლო საფრთხეს ქმნის.

პირადი ინფორმაციის გამოქვეყნებით უშუალოდ მეგან მარკლის უფლებების დარღვევის გამო ზიანის ანაზღაურების დაკისრების შესახებ სასამართლო გადაწყვეტილებას მოგვიანებით, აპრილში ან მაისში გამოიტანს. ბოდიშის წერილის გამოქვეყნების საკითხიც მოგვიანებით გადაწყდება.

აღსანიშნავია, რომ ბრიტანული ტაბლოიდი სასამართლოს მიერ გამოტანილი გადაწყვეტილების გასაჩივრებას გეგმავს.

ამავე თემაზე: