დუმილი ყოველთვის ოქრო არ არის. ზოგჯერ პირიქით — დანაშაულია.

10 თებერვალს ქობულეთის რაიონში მომხდარი საზარელი ფაქტის შემდეგ დადუმება სწორედ ასეთი შემთხვევაა.

14 წლის მოზარდის ირგვლივ განვითარებულმა მოვლენებმა — მასზე სექსუალურმა ძალადობამ, ოჯახის წევრების მიერ ფიზიკურმა ძალადობამ, სახელმწიფოს არამყისიერმა და დაგვიანებულმა ქმედებამ, სოციალური თუ საგანმანათლებლო ინსტიტუტების გულგრილობამ, სამართლის ძებნამ და უსამართლობასთან შეჯახებამ, საბოლოოდ კი, მოზარდის სუიციდმა, კიდევ ერთხელ თვალნათლივ დაგვანახა ის მანკიერი მხარეები, რომლებიც ავთვისებიანი სიმსივნის მეტასტაზებივით არის გამჯდარი ჩვენს ყოველდღიურობაში. ამ მახინჯ სინამდვილეს შეუძლია მსხვერპლი, მნიშვნელობა არ აქვს, ზრდასრული იქნება ის თუ არასრულწლოვანი, დამნაშავედ შერაცხოს მხოლოდ იმის გამო, რომ ის ქალია.

სექსუალური და ფიზიკური ძალადობის მსხვერპლი მოზარდის თვითმკვლელობა, რომელსაც გარდაცვლილის ოჯახის წევრმა დანაშაულის გამოსყიდვა უწოდა, ჩვენთვის, ყველასთვის, წითელ ხაზად, ათვლის წერტილად უნდა ვაქციოთ. უპირობო ბრძოლა გამოვუცხადოთ იმ მანკიერებებს და სტერეოტიპებს, რომელთა გამოც დღეს გოგოები და ქალები ოჯახებში, სკოლებში, ქუჩებში, სოციალური მუშაკების ოფისებსა თუ პოლიციის განყოფილებებში სამართლოდ იჩაგრებიან. მხოლოდ ასე შევძლებთ 14 წლის მსხვერპლისადმი ჩვენი დანაშაულის გამოსყიდვას, რომელიც ვერც მოძალადეებისგან დავიცავით და რომელსაც ვერც სამართლიანობის პოვნაში დავეხმარეთ.

სინამდვილეში, ეს არ არის მხოლოდ ქალების, გოგოების, მათი უფლებების დამცველებისა და სამოქალაქო აქტივისტების ბრძოლა. ეს არის ბრძოლა სიკეთესა და ბოროტებას შორის; ძირგამომომპალ აზროვნებასა და პროგრესულ აზროვნებას შორის. ესაა სისასტიკისა და ჰუმანურობის დაპირისპირება, რომელშიც უმნიშვნელოვანესია, რომ ქალების ხმასთნ ერთად კაცების ხმაც ისმოდეს. ამ ბრძოლაში გამარჯვებისთვის საჭიროა, რომ ჩვენს საზოგადოებაში ფესვგადგმულ უსამართლობაზე, ჩაგვრასა და დისკრიმინაციაზე კაცები ხმამაღლა ავლაპარაკდეთ და ვთქვათ, რომ აუცილებელია ქალს ჰქონდეს ინფორმირებული არჩევანის გაკეთების საშუალება როგორც საკუთარი სხეულის, ისე საკუთარი ცხოვრების შესახებ.

მხოლოდ ასე, ქალებისა და გოგოების უფლებების დაცვით, შესაბამისი უნარებითა და ცოდნით აღჭურვთ, მათი ეკონომიკური გაძლიერებით, განათლების ხელშეწყობით, თანაბარი შესაძლებლობების უზრუნველყოფით, საზოგადოებრივ თუ პოლიტიკურ ცხოვრებაში მათი როლის გაზრდით, თანასწორობითა და ურთიერთპატივისცემით მივაღწევთ სიმშვიდესა და ჰარმონიას ოჯახებში, საზოგადოებასა და ქვეყანაში.

კამპანია "კაცები ზრუნავენ" 1 000 მშობლის მარშს უერთდება, რომელიც 26 თებერვალს, 17:00 საათზე, ვარდების მოედანზე გაიმართება.