21 წლის ცურვის მასწავლებელი ჩრდილოეთ იორკშირიდან ყველაზე ახალგაზრდა ქალი გახდა, ვინც ატლანტიკის ოკეანე ნავით დამოუკიდებლად გადაცურა.

ჯესმინ ჰარისონმა, რომელიც ნახევარ განაკვეთზე მომუშავე მასწავლებელია, მოგზაურობა გასული წლის დეკემბერში დაიწყო კანარის კუნძულებიდან. 70 დღის, სამი საათისა და 48 წუთის შემდეგ მან ანტიგუას ნაპირებს მიაღწია და რეკორდიც დაამყარა.

კარიბის ზღვის აუზის კუნძულზე მას გულშემატკივრები დახვდნენ და რეკორდსმენი ახალგაზრდას ვოიაჟის დასასრული პირდაპირი ეთერით გადასცეს ფეისბუქზე.

ჰარისონმა აღნიშნა, რომ ეს იყო გამოცდილება, რომლის მიღებაც მთელი გულით სურდა, თუმცა, კითხვაზე, რის გაკეთებას აპირებდა პირველ რიგში, მან დაუფიქრებლად დაასახელა ჭამა.

თითქმის 5-ათასკილომეტრიანი მოგზაურობა, ჰარისონის თქმით, "კარგ და ცუდ მოგონებებს" უკავშირდება, თუმცა, იგი აღნიშნავს, რომ ამ ყველაფერმა ნორმალური ცხოვრებისგან გაქცევის დაფასების საშუალება მისცა.

"ამაზე უკეთესს ვერაფერს ინატრებ, ყველაფერს შორდები — სოციალურ მედიას, ცუდ ამბებს და საერთოდ ყველაფერს", — ამბობს რეკორდსმენი.

მოგზაურობისას ჰარისონი ორი საათი ცურავდა, მომდევნო ორ საათს კი ეძინა. ამ ხნის განმავლობაში მან მიიღო რამდენიმე დაზიანებაც, თებერვლის დასაწყისში კი ნავიც ამოუტრიალდა.

ფოტო: Penny Bird / Atlantic Campaigns

ერთწლიანი ვარჯიშის შემდეგ მიღებული შედეგი ჰარისონმა ქველმოქმედებისთვის გამოიყენა. თავისი რეკორდით მან $14 ათასის შეგროვება შეძლო, რომელიც ფონდ Blue Marine Foundation-ს გადაერიცხება.

"მსურს, ახალგაზრდებისთვის მოტივაციად ვიქცე, რომ მათ რაღაც გააკეთონ — რაღაც რაც ან მსოფლიოს შეცვლის, ან, უბრალოდ, მათი კომფორტის ზონიდან გამოიყვანს", — დასძენს ჰარისონი ვებგვერდზე გამოქვეყნებულ მიმართვაში.

აქამდე, ყველაზე ახალგაზრდა ქალი, რომელმაც დამოუკიდებლად გადაცურა ატლანტის ოკეანე, 22 წლის ქეითი სპოცი იყო აშშ-დან. მან რეკორდი 2010 წელს დაამყარა.