ნაციონალური მოძრაობის თავმჯდომარის, ნიკა მელიას განცხადებით, ოპოზიციას აქვს დიალოგის სურვილი და ყველაფერს გააკეთებს პროცესის დეესკალაციისთვის. მისივე თქმით, მოლაპარაკებები უნდა იყოს შედეგზე ორიენტირებული და არა "დიალოგი დიალოგისთვის".

"ჩვენ, ოპოზიციია და მე ოპოზიციის სახელით შემიძლია თამამად გითხრათ, რომ ყველაფერს გავაკეთებთ იმისათვის, რომ ხელი შევუწყოთ პროცესის დეესკალაციას. მზად ვართ დიალოგისთვის. ჩვენი პარტნიორების, ლიეტუვას და არამხოლოდ მათი ჩართულობით, ბუნებრივია იმედს ვიტოვებთ, რომ ამ შემთხვევაში მაინც ხელისუფლება რეალობას შეაფასებს ადეკვატურად. რაც მთავარია, ოპოზიციას როგორც ჰქონდა სურვილი, რომ ვითარება აქამდე არ მისულიყო, ისეთივე მოწადინებულია დილოგისთვის. ოღონდ დიალოგი ბუნებრივია, უნდა იყოს შედეგზე ორიენტირებული და არა დიალოგი დიალოგისთვის", — განაცხადა მან მას შემდეგ, რაც დასრულდა ოპოზიციის შეხვედრა ლიეტუველ პარლამენტართან.

საქართველოში ვიზიტით ლიეტუვის სეიმის საგარეო საქმეთა ურთიერთობების კომიტეტის თავმჯდომარე ჟიგიმანტას პავილიონისი იმყოფება. ის დღეს შეხვდა ევროპული საქართველოს ლიდერებსა და ნიკა მელიას, შემდეგ მმართველ გუნდს პარლამენტში და მოგვიანებით გაერთიანებულ ოპოზიციას.

პავილიონისმა განაცხადა, რომ ლიეტუვას, როგორც მეგობარ ქვეყანას, სურს, საქართველოში პოლიტიკური კრიზისი აღმოფიხვრას. მანვე აღნიშნა, რომ საქართველოს აქვს ორი გამოსავალი — აირჩოს ლიეტუვის ან ბელარუსის გზა. ლიეტუვის გზა კი ნატოსა და ევროკავშირში გაწევრიანების შანსებს ზრდის. თუმცა, მისი თქმით, ამას სჭირდება დაპირისპირებული ფლანგების ერთობლივი მუშაობა და პოლიტიკური რეპრესიების შეწყვეტა.

მისივე თქმით, როდესაც ისინი ნატოში წევრიანდებოდნენ, ლიეტუვაში მარჯვენა და მარცხენა ფლანგი ერთად მუშაობდა და არავინ დაუპატიმრებიათ. მანვე აღნიშნა, რომ ნატოსა და ევროკავშირში მხოლოდ საუკეთესოები წევრიანდებიან.

"თუ ლიეტუვის გზით გსურთ სიარული, გაერთიანდით, სანამ გვიანი არაა. გვიანი იქნება, როცა ქუჩებში ტანკებს დაინახავთ, თუმცა, პრობლემა ისაა, რომ რუსეთს არ სჭირდება ტანკები. თქვენ თავად ებრძვით ერთმანეთს, ეს საუკეთესო საჩუქარია, რაც შეიძლება პუტინს გაუკეთო. შეწყვიტეთ, გთხოვთ, გაერთიანდით", — განაცხადა მან.

პავილიონისთან შეხვედრის შემდეგ, ქართული ოცნების დეპუტატმა, ნიკოლოზ სამხარაძემაც განაცხადა, რომ ერთადერთი გამოსავალი არის დიალოგი.