დღეს ივანე ჯავახიშვილის სახელობის თბილისის სახელმწიფო უნივერსიტეტს იუბილე აქვს. კავკასიაში პირველი ეროვნული უნივერსიტეტი 1918 წლის 8 თებერვალს, დავით აღმაშენებლის ხსენების დღეს გაიხსნა და დღეს 99 წლის გახდა.

1989 წელს თბილისის სახელმწიფო უნივერსიტეტს მისი დამაარსებლის – ივანე ჯავახიშვილის სახელი მიენიჭა.

თსუ-ს იუბილეს ულოცავს ქართული ოცნების ერთ-ერთი ლიდერი და კონკურენციის სააგენტოს თავჯდომარე ნოდარ ხადური:

"ასეთი საინტერესო ასაკი მინდა მივულოცო ჩემს და ჩვენს უნივერსიტეტს, რომელიც საქართველოს დამოუკიდებელ რესპუბლიკაზე სამი თვით უფროსია. ადამიანისათვის ეს ბევრია, ქვეყნისა და უნივერსიტეტისათვის ცოტა. 800-1000 წლის წინ სხვადასხვა უმაღლესი სასწავლო დაწესებულება დაარსდა, რომლებიც დღეს მსოფლიოს საუკეთესო უნივერსიტეტებადაა აღიარებული. თბილისის უნივერსიტეტის ამბიცია უნდა იყოს, რომ თვალი და გული ასეთი უნივერსიტეტებისაკენ ეჭიროს და მათ ყოველდღიურად უახლოვდებოდეს. სწავლა და სწავლება, კვლევები მუდმივად უნდა უმჯობესდებოდეს".

ხადური დასძენს, რომ ხვალიდან, ერთი წლის განმავლობაში, ყოველი დღე უნივერსიტეტის ისტორიაში მეასე იქნება.

დღეისთვის თსუ-ს 7 ფაკულტეტზე 22 ათასამდე სტუდენტი სწავლობს.