აშშ-ის ახალ პრეზიდენტს, ჯო ბაიდენს, Amazon-მა წერილი გაუგზავნა და თეთრ სახლს კორონავირუსის ვაქცინის გავრცელებაში დახმარება შესთავაზა. Amazon-ის მსოფლიო სამომხმარებლო ბაზრის დირექტორის, დეივ კლარკის თქმით, "კომპანია მზადაა, დაეხმაროს ბაიდენს მისი მიზნის მიღწევაში", რომელიც პრეზიდენტობის პირველი 100 დღის განმავლობაში 100 მილიონი ამერიკელის ვაქცინაციას მოიაზრებს. დახმარება გულისხმობს როგორც უშუალოდ კომპანიის მიერ განხორციელებულ ქმედებებს, ასევე მისი საინფორმაციო და საკომუნიკაციო რესურსებით პრეზიდენტის ადმინისტრაციის უზრუნველყოფას, რაც, კლარკის შეფასებით, "დაუყოვნებლივი შედეგის მომცემი იქნება".

ეს ქმედება კომპანიის და ქვეყნის პრეზიდენტის ურთიერთობის ცვლილებაზე მიანიშნებს, რომელიც დონალდ ტრამპის თანამდებობაზე ყოფნის დროს განსაკუთრებით დაძაბული იყო, რადგან ტრამპის სამიზნეში Amazon-ის აღმასრულებელი დირექტორი და The Washington Post-ის მფლობელი, ჯეფ ბეზოსი, არაერთხელ მოხვდა.

Amazon, რომელიც აშშ-ში მეორე უდიდესი დამსაქმებელია, მზადაა, თავად უზრუნველყოს თანამშრომლების აცრა, როცა ვაქცინა მათთვისაც ხელმისაწვდომი იქნება.

წინამორბედისგან განსხვავებით, ბაიდენმა ვაქცინის ხელმისაწვდომობა მნიშვნელოვან გამოწვევად განსაზღვრა.

ახლადარჩეულ პრეზიდენტს ვაქცინაციასთან დაკავშირებით საგანგებო გეგმა აქვს შემუშავებული. გადაუდებელ სიტუაციების მართვის ფედერალური სააგენტოს და ეროვნული გვარდიის საერთო მობილიზაციით, ასევე საჭირო ინვენტარის — ამპულების და შპრიცების — წარმოებით, მისი პრეზიდენტობის პირველივე თვეში ფედერალურად დამტკიცებული ვაქცინაციის 100 პუნქტი იქნება მზად აცრების ჩასატარებლად. როგორც ამას ბაიდენის თანამოაზრეები აფასებენ, აღნიშნული სტრატეგია, რომელიც ფედერალურ დონეზეა დაგეგმილი, დეფიციტის უფრო რბილად გადატანას უზრუნველყოფს, ვიდრე ეს ცალკეული შტატების დონეზე, ტრამპის გეგმის შემთხვევაში იქნებოდა.

არასაკმარისი რაოდენობის გამო კორონავირუსის ვაქცინის გავრცელება არაერთ სირთულეს უკავშირდება. გაზრდილი მოსახლეობის პირობებში რამდენიმე შტატში ვაქცინის ნაკლებობაა. მაგალითისთვის, მოსალოდნელი დეფიციტის შესახებ გაფრთხილების შემდეგ, ნიუ-იორკში 23 ათას ადამიანს წინასწარ დათქმული აცრა არ გაუკეთდა, რადგან, გაურკვეველი მიზეზებით, Moderna-ს ვაქცინის მიღება შეფერხდა. მიჩიგანის, უისკონსინის და მინესოტას შტატების გუბერნატორებმა გასულ კვირას ტრამპს მისწერეს, რომ თუკი ფედერალური მთავრობა მათ დასახმარებლად არაფერს გააკეთებდა, კლინიკებს დაგეგმილი მასობრივი აცრების გაუქმება მოუწევდა.

Amazon ერთადერთი კერძო კომპანია არაა, რომელიც საყოველთაო ვაქცინაციის პროცესში ჩართვას აპირებს. Starbucks-მა ასევე გამოთქვა სურვილი, თავისი რესურსებით დახმარებოდა ვაშინგტონის შტატის მომარაგებას.