აშშ-ის არჩეული პრეზიდენტის, ჯო ბაიდენისა და არჩეული ვიცეპრეზიდენტის, კამალა ჰარისის, ინაუგურაციაზე, რომელიც 20 იანვარს გაიმართება, ქვეყნის სახელმწიფო ჰიმნს ლედი გაგა შეასრულებს.

წინასაარჩევნო კამპანიის მიმდინარეობისას ლედი გაგა ჯო ბაიდენს მუდმივად უჭერდა მხარს. აღსანიშნავია, რომ მას სახელმწიფო ჰიმნი 2016 წელსაც აქვს შესრულებული Super Bowl-ის შოუზე.

ინაუგურაციის ცერემონიაზე, რომელსაც მსახიობი ტომ ჰენკსი გაუძღვება, საკუთარი მუსიკალური პერფორმანსით წარდგება ჯენიფერ ლოპესიც. ღონისძიებაზე ასევე გამოჩნდებიან ამანდა გორმენი — ახალგაზრდა პოეტის ეროვნული ჯილდოს პირველი გამარჯვებული — რომელიც საკუთარ ლექსებს წაიკითხავს და ანდრეა ჰოლი — მეხანძრეთა საერთაშორისო ასოციაციის პრეზიდენტი — რომელიც ერთგულების ფიცს წარადგენს. ასოციაცია პირველი ორგანიზაცია იყო, რომელმაც ბაიდენს კამპანიის დაწყებისთანავე დაუჭირა მხარი.

ღონისძიებაზე გამორჩეული როლი ექნება ლეო ჯ. ო'დონოვანსაც, ბაიდენის დიდი ხნის მეგობარსა და ჯორჯთაუნის უნივერსიტეტის ყოფილი პრეზიდენტს. ხოლო ცერემონიას აკურთხებს ბაიდენის მშობლიური ქალაქის, უილმინგტონის, მეთოდისტური ეკლესიის მღვდელი, ღირსი მამა სილვესტერ ბიმენი.

"ისინი ჩვენი დიდებული ერის უზარმაზარ მრავალფეროვნებას წარმოაჩენენ", — აცხადებს საინაუგურაციო კომიტეტის აღმასრულებელი დირექტორი, ტონი ალენი, — "ეს ადამიანები დაგვეხმარებიან, ღირსებით აღვნიშნოთ პრეზიდენტის ინაუგურაციის ხანგრძლივი ტრადიცია, არჩეული პრეზიდენტი ბაიდენი და არჩეული ვიცეპრეზიდენტი ჰარისი კი საკუთარ ფიცს კაპიტოლიუმის დასავლეთ ნაწილში დადებენ".

ალენმა აგრეთვე დასძინა, რომ ბაიდენისა და ჰარისის მმართველობის დაწყება ქვეყნის ისტორიაში ახალი თავია, როდესაც "ამერიკა კვლავ გამთლიანდება და დაძლევს არსებულ გამოწვევებს".