დასავლური მედიაგამოცემების ცნობით, პრინცმა ჰარიმ და მეგან მარკლმა ყველა სოციალური ქსელის გამოყენება სამუდამოდ შეწყვიტეს ამ სივრცეში მიღებული "სიძულვილის" გამო. ბრიტანული The Times-ის ცნობით, წყვილი "არ აპირებს" მათი ახლადშექმნილი კომპანიისთვის, Archewell, სოციალური მედიის პლატფორმა გამოიყენოს და "ნაკლებსავარაუდოა", პირადი ანგარიშებიც აღადგინოს.

წყვილი ვირტუალური ურთიერთობებისგან ჯერ კიდევ გასულ წელს დისტანცირდა, როცა ოქტომბრის თვეში მარკლმა განაცხადა, რომ "დიდი ხანია, სოციალურ ქსელში აღარ შესულა".

"ჩემი პირადი გადაწყვეტილება იყო, არ მქონოდა ანგარიში; ამდენად, მართლა არ ვიცი, მანდ რა ხდება. ეს კი, ბევრი მხრივ, სასიკეთოა ჩემთვის", — აღნიშნა მან, — "ძალიან მაწუხებს, რომ ადამიანების ნაწილი მისით არის შეპყრობილი. იგი იმდენადაა ჩვენი ყოველდღიური კულტურის ნაწილი, რომ ბევრისთვის, სხვა ყველაფერთან ერთად, ერთგვარ დამოკიდებულებად იქცა".

მეგანმა მაშინ საკუთარ გამოცდილებაზეც ისაუბრა და ის დრო გაიხსენა, როცა ტროლგვერდებისა და ანგარიშების სამიზნედ იქცა.

2020 წელს მეგანმა და ჰარიმ განაცხადეს, რომ მაღალი რანგის სამეფო ტიტულებს თმობდნენ და სამხრეთ კალიფორნიაში გადადიოდნენ საცხოვრებლად. ცოტა ხნის კი წყვილმა პოდკასტების გამოსაქვეყნებლად Spotify-სთან გააფორმა კონტრაქტი. მომდევნო წლების განმავლობაში ისინი ასევე ითანამშრომლებენ ნეტფლიქსთან, რათა ფილმები, სერიალები, დოკუმენტური და საბავშვო გადაცემები შექმნან.