სპეციალური პენიტენციური სამსახურის გენერალური დირექტორის, გიორგი პატარიძის ინფორმაციით, ქვეყანაში სულ 27 კოვიდდადებითი პატიმარია. როგორც პატარიძე იმედის ეთერში ამბობს, პატიმრების ტესტირება 2020 წლის ბოლოდან დაიწყო.

"ქალთა დაწესებულებაში, დაიტესტა 329 მსჯავრდებულ-ბრალდებული და აქედან გვაქვს მხოლოდ და მხოლოდ 23 დადასტურებული შემთხვევა. რა თქმა უნდა, მოხდა მათი მყისიერი იზოლირება სხვა კონტიგენტისგან. ისინი თავს კარგად გრძნობენ და ისინი არიან ე.წ. უსიმპტომო ვირუსმატარებლები [...] ასევე, სამოქალაქო კლინიკაში ჩვენ გვყავს 4 კოვიდდადასტურებული მსჯავრდებულ-ბრალდებული.

შესაბამისად, დღეის მდგომარეობით, მე შემიძლია დავადასტურო, კოვიდინფიცირებული, პენიტენციურ სისტემაში, არის სულ 27 პატიმარი", — განაცხადა გიორგი პატარიძემ.

პატარიძის ინფორმაციით, PCR ტესტებით პატიმრების კოვიდ-სტატუსი უკვე შემოწმდა სამ დაწესებულებაში, ხვალ დაგეგმილია ტესტირება გეგუთის ციხეში, სადაც 800-მდე მსჯავრდებული გაიტესტება.

"ტესტირების პროცესი, რა თქმა უნდა, გაგრძელდება და მიმდინარე თვის ბოლომდე, ჩვენ სრულად მოვიცავთ მთელ პენიტენციურ დაწესებულებებს", — განაცხადა გიორგი პატარიძემ.

გაიგეთ მეტი: