ჩინელმა მკვლევრებმა ზღვის არსებების ათეულობით ნამარხი შეაგროვეს. ნამარხები 540 მილიონი წლით თარიღდება და სამხრეთ ჩინეთშია ნაპოვნი. მეცნიერთა ვარაუდით, ახლადაღმოჩენილი არსებები ყველაზე ადრეული მეორეულპირიანები არიან (ცხოველები, რომლებსაც ორი ხვრელი ეზრდებათ ემბრიონული განვითარებისას, მათ შორის, ადამიანებიც).

"ეს ნამარხები ნათელს ჰფენს მეორეულპირიანების ევოლუციის ადრეულ ეტაპს", - წერენ მკვლევრები ჟურნალ Nature-ში გამოქვეყნებულ ნაშრომში.

ფოტო: Jian Han

ეს არსება, რომლის ზომებიც 1.3x0.8 მილიმეტრია, ჩანთისებური ფორმით გამოირჩევა. კიდევ ერთი უცნაურობა ისაა, რომ მას ანუსი არ აქვს. მეცნიერების მოსაზრებით, არსებული სტრუქტურა ზღვის წყლისა და საჭმლის ერთად გადაყლაპვის საშუალებას იძლევა. წყალი კონუსების მეშვეობით გამოთავისუფლდება, ნარჩენი მატერია კი სხეულში არსებული ხვრელებით გამოდის გარეთ.

მკვლევარებს ახარებთ ის ფაქტი, რომ ნამარხების შესწავლამ შეიძლება ევოლუციის რამდენიმე საიდუმლოს ახადოს ფარდა. "ამჟამად ხანგრძლივი ისტორიული ჩავარდნა გვაქვს ნამარხების შესწავლაში, რომლის აღმოფხვრის შესაძლებლობაც გვეძლევა", - ამბობს კვლევის თანაავტორი სიმონ კონვეი მორისი, პალეობიოლოგიის პროფესორი კემბრიჯის უნივერსიტეტიდან. შესაძლოა, ჩვენი ადრეული წინაპრები იმდენად მცირე ზომის იყვნენ, რომ მათი ნარჩენები უბრალოდ არ არსებობს, თუმცა ამას დადასტურება სჭირდება.

ასეთი აღმოჩენები კიდევ ერთხელ შეგვახსენებს, რომ საერთო ჯამში ყველა "ერთი გორისანი" ვართ.