ოკუპირებულ გალის რაიონში ხანძარს ამ დრომდე ვერ აქრობენ. გავრცელებულ ხანძართან დაკავშირებით, საქართველოს ცენტრალური ხელისუფლება აფხაზურ მხარეს დახმარებას სთავაზობს. სახელმწიფო უსაფრთხოების სამსახურში აცხადებენ, რომ დღეს, 5 იანვარს, დილიდან რამდენჯერმე გააქტიურდა ცხელი ხაზი და საოკუპაციო რეჟიმს გადაეცა ცენტრალური ხელისუფლების სრული მზადყოფნა ნებისმიერი მიმართულებით დახმარების გაწევასთან დაკავშირებით. მათივე ცნობით, ამ მიზნით, მიმდინარეობს კომუნიკაცია ყველა არსებული მექანიზმის გამოყენებით.

გალი TV-ს ინფორმაციით, ხანძარმა გალის რაიონის 9 სოფელი დაფარა. ხანძრის მასშტაბის გამო აფსნიპრესის ცნობით, რაიონში საგანგებო მდგომარეობა და ადგილობრივი მოსახლეობის ევაკუაცია გამოცხადდა. ტყის მასივის გარდა, ცეცხლის საცხოვრებელ სახლებსაც მოედო.

როგორც ადგილობრივმა მოსახლეობამ On.ge-ს უთხრა, ხანძარი ლიკვიდირებული ამ დრომდე არ არის.