გირჩის ლიდერის, ზურაბ ჯაფარიძის განცხადებით, გაუგებარია, რატომ აწესებენ შეზღუდვებს, თუ ეს არ მუშაობს და თუ მუშაობს, რატომ გვაქვს კორონავირუსით ინფიცირებულთა მაღალი რიცხვი ისევ.

"თუ სწორად მართეს ყველაფერი გაზაფხულზე, როცა იძახდნენ, გმირები ვართო და ყველაზე მაგრები ვართო, მაშინ რატომ გვაქვს ის რიცხვები, რა რიცხვებიც ახლა გვაქვს. და თუ მაშინ იმან არ იმუშავა, ამ შეზღუდვებს ახლა რა შინაარსი აქვს, ხო გაუგებარია. თუ იმუშავა შეზღუდვებმა, რატომ ვართ ახლა ამ დღეში, თუ არ იმუშავა, ხელახლა რატომ ვაგრძელებთ ამ საგიჟეთს, რაც მოწყობილი გვაქვს ქვეყანაში. სინამდვილეში ადამიანები განწირული გვაყვს შიმშილით სიკვდილისთვის", — განაცხადა ზურაბ ჯაფარიძემ.

5 იანვრის მონაცემებით, საქართველოში კორონავირუსის 2 316 ახალი შემთხვევა დადასტურდა, გამოჯანმრთელდა — 382, ხოლო გარდაიცვალა 18 ადამიანი.

ქვეყანაში Covid-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა 232 079-ს შეადგენს, გამოჯანმრთელებულთა რაოდენობა — 222 787-ს, პანდემიის გავრცელებიდან დღემდე ვირუსს ჯამში 2 646 პირი ემსხვერპლა.

გარდა ამისა, საქართველოში კორონავირუსის ახალი შტამი დადასტურდა. დაავადებათა კონტროლის და საზოგადოებრივი ჯანმრთელობის ეროვნული ცენტრის (NCDC) ინფორმაციით, სულ კვლევაში სამი საეჭვო შემთხვევა იყო, რომელთაგან ორში შტამის არსებობა არ დადასტურდა. ხოლო ერთ, დეკემბრის თვეში აღებულ ნიმუშში, ახალი "ბრიტანული" შტამის S გენისათვის დამახასიათებელი მუტაცია გამოვლინდა.

NCDC-ის ცნობით, პაციენტი 50 წელს გადაცილებული მამაკაცია, რომლის მდგომარეობა დამაკმაყოფილებელია და თვითიზოლაციაში იმყოფება. გამოვლენილია ინფიცირებულთან კონტაქტებიც.

პაატა იმნაძის თქმით, ამ დროისათვის არსებული მტკიცებულებებით, ახალი შტამი სიმძიმისა და ლეტალური შემთხვევების სიხშირით არსებული შტამისგან არ გამოირჩევა, გარდა იმისა, რომ ახალი შტამი სწრაფად ვრცელდება. პაატა იმნაძე მოსახლეობას ისევ პირბადის ტარებისა და დისტანციის დაცვისკენ მოუწოდებს.

ბრიტანეთში გამოვლენილი მუტაცია უკვე დადასტურებულია მსოფლიოს 30-ზე მეტ ქვეყანაში და დღეისათვის არსებული მონაცემებით შესაძლოა ვირუსის უფრო ადვილად გავრცელებას უკავშირდებოდეს, მაგრამ NCDC-ში აცხადებენ, რომ დაავადების მიმდინარეობის სიმძიმეზე გავლენას არ ახდენს.

NCDC-ის ხელმძღვანელი, ამირან გამყრელიძე აცხადებდა, რომ მეცნიერების თქმით, ვირუსის ახალი შტამი ახალგაზრდებში უფრო მარტივად გადადის.