დაავადებათა კონტროლის ეროვნული ცენტრის ხელმძღვანელის მოადგილის, პაატა იმნაძის განცხადებით, კორონავირუსით რეინფიცირების 10-მდე შესაძლო შემთხვევას სწავლობენ. იმნაძის თქმით, ეს მარტივი საქმე არ არის და მსოფლიოში ხელახლა ინფიცირების რამდენიმე საქმე არის აღწერილი.

"ვსწავლობთ რამდენიმე ასეთ შემთხვევას, პაციენტების გენეტიკური მასალა მოვიძიეთ. ამას სჭირდება სამეცნიერო მტკიცებულებები, რომელიც ვირუსის გენეტიკურ შესწავლაზე უნდა იყოს დამყარებული. გადარჩეულია, დაახლოებით, 10-მდე შემთხვევა", — განაცხადა იმნაძემ.

5 იანვრის მონაცემებით, საქართველოში კორონავირუსის 2 316 ახალი შემთხვევა დადასტურდა, გამოჯანმრთელდა — 382, ხოლო გარდაიცვალა — 18.

უწყებათაშორის საკოორდინაციო საბჭოსთან არსებული ოპერაციული შტაბის უფროსის მოადგილის, ბერდია სიჭინავას განცხადებით, ბოლო 24 საათში ქვეყნის მასშტაბით ჩატარდა 14 511 ტესტი, მათ შორის 9 300 კვლევა ანტიგენისა და 5 211 PCR ტესტით.