საგანგებო სიტუაციების მართვის სამსახურის ცნობით, სამეგრელო-ზემო სვანეთის რეგიონში მინდვრის ხანძრის 40 კერაა. მათი ცნობით, ცეცხლი, მეტწილად, ბალახსა და ეკალბარდს უკიდია, მაგრამ არსებობს, საფრთხე, რომ ძლიერი ქარის გამო ხანძარი პლანტაციებსა და ნარგავებზე გავრცელდეს.

საგანგებო სიტუაციების მართვის სამსახურის ინფორმაციით, ამ ეტაპზე ადგილზე იმყოფებიან მეხანძრე-მაშველები. გარდა ამისა, პრევენციისა და დახმარების მიზნით გურიიდან, აჭარიდან და იმერეთიდან ხდება დამატებითი ძალების და სახანძრო ტექნიკის მობილიზება.

შინაგან საქმეთა სამინისტროს საგანგებო სიტუაციების მართვის სამსახური მოუწოდებს მოსახლეობას თავი შეიკავონ მინდვრებში და სახნავ მიწებზე ბალახის დაწვისგან. დასავლეთ საქართველოში ძლიერი ქარია და მშრალი ამინდი, რაც ხელს უშლის მეხანძრე-მაშველებს ხანძრების სალიკვიდაციო სამუშაოებში.

ასევე, საგანგებო სიტუაციების მართვის სამსახური იუწყება, რომ მინდორში და სახნავ მიწებზე ბალახის დაწვამ, შესაძლოა, გამოიწვიოს ხანძრის გავრცელება როგორც საცხოვრებელ სახლებზე, ასევე, ტყის მასივებზე.