დაავადებათა კონტროლის და საზოგადოებრივი ჯანმრთელობის ეროვნული ცენტრის დირექტორის მოადგილე, პაატა იმნაძის თქმით, საახალწლო სუფრის და სტუმრიანობის შედეგები სადღაც 10-14-ში გამოჩნდება. ამის შესახებ მან საზოგადოებრივი მაუწყებლის ეთერში განაცხადა.

"გაზრდილი მობილობის შედეგები გამოჩნდება სადღაც 10-14 რიცხვისთვის, გამოჩნდება, ხომ არ მიგვიყვანს ეს შემთხვევების მატებამდე. უფრო საშიში, რა თქმა უნდა, იქნებოდა საახალწლო სუფრები, სადაც ადამიანები ნიღბის გარეშე იქნებოდნენ. დანარჩენი რა ინფორმაციაც მაქვს, მაღაზიებში და სავაჭრო ცენტრებში კარგად იყო დაცული დისტანცია. პირველის სუფრის და სტუმრიანობის შედეგები სადღაც 10-14-ში გამოჩნდება", — ამბობს იმნაძე.

3 იანვრის მონაცემებით, საქართველოში კორონავირუსის 417 ახალი შემთხვევა დადასტურდა, გამოჯანმრთელდა — 2 469, ხოლო გარდაიცვალა — 31.