ქართული ოცნების ერთ-ერთი ლიდერი, მამუკა მდინარაძე აცხადებს, საქართველოს პარლამენტის პოლიტიკა ოჯახიში ძალადობის მიმართ ლოიალური ვერ იქნება. მდინარაძის თქმით, პარლამენტარ დიმიტრი ხუნდაძის წინადადებას, რომლის მიხედვითაც ამნისტია უნდა შეეხოს ოჯახში ძალადობაში ბრალდებულთა ნაწილს, ფრაქცია ქართული ოცნების მხარდაჭერა არ ექნება.

"ამ წინადადებას ფრაქცია ქართულ ოცნებაში უმრავლესობის თანხმობა არ ექნება, პირდაპირ გეუბნებით აქვე გადაჭრით. სისხლის სამართლის პოლიტიკას, მათ შორის, განსაზღვრავს საქართველოს პარლამენტი. სხვა ყველა ის სამართალდამცავი უწყება, რომელიც ამ სფეროში მუშაობს, არის ამ პოლიტიკის გამტარებელი. მე გეუბნებით, რომ პოლიტიკა ოჯახში ძალადობის მიმართ ვერ იქნება ლოიალური", — განაცხადა მამუკა მდინარაძემ.

დღეს, 30 დეკემბერს, ამნისტიის შესახებ კანონპროექტის განხილვისას, ქართული ოცნების დეპუტატმა, დიმიტრი ხუნდაძემ განაცხადა, რომ ოჯახში ძალადობა ემოციურ ფონზეც ხდება და ამნისტიის შესახებ კანონპროექტში ეს გათვალისწინებული უნდა იყოს.

2 კვირის წინ პარლამენტში დააინიცირეს საქართველოს კანონის პროექტი ამნისტიის შესახებ, რომლის მიხედვითაც ამინისტია შეეხება სულ 44 მუხლით გათვალისწინებულ დანაშაულს. ამ დროისთვის კანონპროექტი არ მოიცავს ისეთ მძიმე მუხლებს, როგორიცაა მკვლელობა, ოჯახში ძალადობა და ასე შემდეგ.

ასევე, კანონპროექტი ითვალისწინებს იმ პირთა განთავისუფლებას სისხლის სამართლის პასუხისმგებლობისგან და შესაბამისი სასჯელისგან, რომელთაც 2020 წლის 11 დეკემბრამდე ჩაიდინეს ამ კანონპროექტით გათვალისწინებული ცალკეული დანაშაული.

საქართველოს შინაგან საქმეთა სამინისტროს სტატისტიკის მიხედვით, 2020 წლის პირველ ექვს თვეში ოჯახში ძალადობის 2 607 შემთხვევა მოხდა, მათ შორის 11 მკვლელობით დასრულდა. 15 ივლისამდე პერიოდში 5 304 შემაკავებელი ორდერი გამოწერა.

ოჯახში ძალადობა არ გულისხმობს მხოლოდ ფიზიკურ შეხებას. ოჯახის წევრის მხრიდან ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა ასევე ოჯახში ძალადობაა და კანონით აკრძალულია.

ოჯახში ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა. საკონსულტაციო მომსახურების გაწევის მიზნით ფუნქციონირებს ცხელი ხაზი: 116 006. შესაძლებელია 112-ის აპლიკაციის გადმოწერაც, სადაც ღილაკზე SOS დაჭერით პოლიციასთან შეტყობინება შევა და სამართალდამცველები ლოკაციის მიხედვით გიპოვიან. აღსანიშნავია ისიც, რომ არსებობს არაერთი არასამთავრობო ორგანიზაცია, რომლებიც ოჯახში ძალადობის მსხვერპლებს სხვადასხვა ტიპის დახმარებას უფასოდ სთავაზობენ.

გაიგეთ მეტი: