ქუთაისის შემოვლით გზაზე ორმხრივი მოძრაობა გაიხსნა. საავტომობილო გზების დეპარტამენტის თავმჯდომარის, ირაკლი ქარსელაძის განცხადებით, ამ ეტაპზე დარჩენილია გზის 10კმ-იანი მონაკვეთი, სადაც 2-ზოლიანი მოძრაობაა. რამდენიმე კვირაში კი სრულად 4 ზოლზე გახდება მოძრაობა შესაძლებელი.

"მიუხედავად პანდემიის გამოწვევებისა, გამორჩეული აღმოჩნდა 2020 წელი. ჩვენ ჯერ კიდევ კოვიდამდე დავაანონსეთ 70კმ მაგისტრალური გზის მშენებლობა, რომელიც შესრულებულია. კერძოდ, გუშინ ქუთაისის შემოვლით გზაზე, 40კმ აშენებული გზიდან, 19კმ-იან მონაკვეთს, რომელიც ზაფხულში გავხსენით დაემატა კიდევ 12 კმ-იანი მონაკვეთი და ეტაპობრივად უახლოეს კვირებში მოხდება უკვე სრულად 4 ზოლიანი გზით სარგებლობა", — აღნიშნა ქარსელაძემ.

მისივე თქმით, აღმოსავლეთ-დასავლეთის დერეფნით სარგებლობისას მოქალაქეებს საშუალება აქვთ გვერდი აუარონ ქუთაისს, გაანახევრონ გადაადგილების დრო და ქალაქიც განტვირთონ. გარდა ამისა, ქარსელაძემ დაამატა, რომ გზის ახალი მონაკვეთების საშუალებით, იანვრის თვიდან მოქალაქეებს საშუალება ექნებათ ბათუმი-თბილისის საავტომობილო გზაზე მგზავრობის 1 საათი დაზოგონ.