დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, როცა საქართველოში კორონავირუსის საწინააღმდეგო ვაქცინა შემოვა, პირველი გაიკეთებს.

"საქართველოში რომ შემოვა ვაქცინა, გაძლევთ პირობას, პირველი ავიცრები, არ არის პრობლემა. მოგეხსენებათ, დიდი ხანია, დამკვიდრებული მაგალითია, ამერიკის პრეზიდენტები პირველი აძლევენ სისხლს, დონაცია, რომ ადვოკატირება გაუწიონ ამას. აქაც, დარწმუნებული ვარ, იქნება შესაბამისი, რომ ქვეყნის ხელმძღვანელობა და პირველი პირები, ასევე, ცნობადი სახეები გაიკეთებენ აცრას. ვაქციანაცია მედიცინის სფეროში არის ყველაზე დიდი გამარჯვებების სიმბოლო", — განაცხადა ამრიან გამყრელიძემ.

მსოფლიოში რამდენიმე ვაქცინამ უკვე გაიარა ავტორიზაცია ჯანდაცვის შესაბამის უწყებებში. მაგალითად აშშ-ში FDA-მ უკვე ორი ვაქცინა Pfizer და Moderna დაამტკიცა.

ამირან გამყრელიძის თქმით, რამდენიმე ქვეყანაში კორონავირუსის ვაქცინით არჩევითი ჯგუფების ვაქცინაცია დეკემბერში დაიწყება, ხოლო ფართომასშტაბიანი ხელმისაწვდომობა ვაქცინაზე მომავალი წლის გაზაფხულიდან იქნება. გამყრელიძის თქმით, საქართველოში ხელმისაწვდომი იქნება ის ვაქცინა, რომელიც ჯანმრთელობის მსოფლიო ორგანიზაციის მიერ იქნება დამტკიცებული.

დაავადებათა კონტროლის ცენტრის ხელმძღვანელმა განაცხადა, რომ ვაქცინის მოსაპოვებლად ისინი ალტერნატიული გზებითაც მუშაობენ, ანუ სხვადასხვა კომპანიასთან პირდაპირ მოლაპარაკებებს აწარმოებენ. რაც შეეხება ვაქცინაციას, გამყრელიძის თქმით, ეს პირველ რიგში მაღალი რისკის ჯგუფს, სამედიცინო პერსონალს შეეხება. შემდეგ უკვე იქნებიან ხანდაზმულები და თანხმლები დაავადებების მქონე პირები.

ამავე თემაზე: