გერმანელმა პილოტმა, სემი კრამერმა ცაზე გიგანტური ნემსის ფორმის გამოსახატად 200 კილომეტრი იფრინა და ასე შეახსენა მოსახლეობას, რომ კორონავირუსის ვაქცინა ქვეყანაში უკვე მისაწვდომია.

20 წლის პილოტმა მარშრუტი GPS მოწყობილობაზე მონიშნა და გეზი სამხრეთ გერმანიიდან აიღო. მარშრუტი პირდაპირ ეთერში გამოჩნდა საიტზე flightradar24.

ნახატის შესასრულებლად მას ჯამში 1 საათი და 44 წუთი დასჭირდა, თუმცა ინსტაგრამზე აჩქარებული ვიდეოც გამოაქვეყნა.

"ჯერ კიდევ უამრავი ადამიანი ეწინააღმდეგება ვაქცინის აუცილებლობას და მინდა ჩემი საქციელით მათ შევახსენო, რომ იმისთვის, რომ წინ წავიდეთ, ამ საკითხზე უფრო ინფორმირებულები უნდა იყვნენ", — უთხრა კრამერმა როიტერსის ტელევიზიას.

მან დასძინა, რომ ამით სიხარულიც გამოხატა, რადგან საავიაციო ინდუსტრია პანდემიის დროს ძალიან დაზარალდა. ნემსის დახატვა სარისკო მოხვევებს საჭიროებდა, თუმცა ახალგაზრდა პილოტმა თავი ყველაფერს კარგად გაართვა.

გერმანიაში ვაქცინა ხელმისაწვდომი დღეს, 27 დეკემბერს გახდა. მთავრობა აპირებს, რომ 1,3 მილიონზე მეტი ვაქცინის დოზა ადგილობრივ ჯანდაცვას ეტაპობრივად მიაწოდოს.