დიდი ინგლისურ-ქართული ლექსიკონი, Dictionary.ge, დღეიდან უფასო იქნება. ამის შესახებ მომხმარებელს ვებგვერდის ადმინისტრაციამ ფეისბუქზე აცნობა.

ლექსიკონის შემქმნელები აღნიშნავენ, რომ მათ ყოველთვის სურდათ, "მრავალწლიანი შრომის ნაყოფი" ყველა მსურველისათვის ხელმისაწვდომი ყოფილიყო, თუმცა არაერთი გარემოების გათვალისწინებით, ეს ვერ ხერხდებოდა. ამჯერად კი, სპონსორის საშუალებით, რომელიც ლექსიკონისა და სხვა ინტერნეტრესურსების ხარჯებს დაფარავს, პლატფორმა წინასაახალწლოდ ერთგვარ საჩუქრად იქცა მისით დაინტერესებული ნებისმიერი ადამიანისათვის.

ლექსიკონი, რომელიც 110 000 სიტყვასა და სტატიას მოიცავს, თბილისის სახელმწიფო უნივერსიტეტის ლექსიკოგრაფიული ცენტრის შექმნილია და ამავე სასწავლებლის დასავლეთ ევროპის ენებისა და ლიტერატურის ინსტიტუტის ასოცირებული პროფესორის, თინათინ მარგალიტაძის რედაქტორობით გამოცემულ ინგლისურ-ქართული ლექსიკონის ტომეულებს ეფუძნება, რომელზე მუშაობაც პროფესორმა 1985 წელს დაიწყო.

მარგალიტაძის გარდა ლექსიკონის შექმნაზე, მის მუდმივ დახვეწასა და განახლებაზე გიორგი მელაძე, გელა ხუნდაძე, ნათია კვერნაძე და მაია დავლიანიძე მუშაობენ.

აღსანიშნავია, რომ გარდა დიდი ინგლისურ-ქართული ლექსიკონისა (რომელიც ასევე მოიცავს დარგობრივ ტერმინოლოგიას), ამავე ცენტრის შექმნილია სხვა ონლაინრესურსებიც: ბარბარიზმების ლექსიკონი, ტექნიკური, ბიოლოგიური და სამხედო ტერმინების ინგლისურ-ქართული ლექსიკონები.