დევიდ ფინჩერის ცნობილი ფილმი Zodiac თუ გინახავთ რობერტ დაუნი უმცროსისა და ჯეიკ ჯილენჰოლის მონაწილეობით, მაშინ აუცილებლად გეცოდინებათ აშშ-ის ამ ერთ-ერთი ყველაზე დამაინტრიგებელი გაუხსნელი საქმისა და სერიული მკვლელის შესახებ, რომელიც სან-ფრანცისკოს სანაპირო ზოლზე ხალხს ატერორებდა, პოლიციას კი თავისი უცნაური შიფრებითა და წერილებით უბნევდა თავგზას.

ამ მოვლენებიდან 51 წლის შემდეგ მოყვარული გამომძიებლების საერთაშორისო გუნდი აცხადებს, რომ, როგორც იქნა, "ზოდიაქოს", ნახევარსაუკუნოვანი წერილი გაშიფრეს, რასაც აშშ-ის ფედერალური უწყებებიც ადასტურებენ.

"ზოდიაქომ" 1968 და 1969 წლებში ჩრდილოეთ კალიფორნიაში 5 ადამიანი მოკლა, პარალელურად კი პოლიციასა და გაზეთებს დამცინავ წერილებსა და კრიპტოგრამებს უგზავნიდა. იდუმალ მკვლელს "ზოდიაქო" იმის გამო შეერქვა, რომ მისი კრიპტოგრამები ასტროლოგიურ სიმბოლოებსა და მინიშნებებსაც შეიცავდა.

მთელი ამ წლების განმავლობაში 340-სიმბოლოანი შიფრი გამომძიებლებისთვის ამოუხსნელი რჩებოდა, სანამ ავსტრალიელმა კომპიუტერულმა ინჟინერმა სემ ბლეიკმა, ამერიკელმა კრიპტოგრაფმა დევიდ ორანჩაკმა და ბელგიელმა კომპიუტერულმა ინჟინერმა იარლ ვანმა საბოლოოდ არ განაცხადეს, რომ მოახერხეს სიმბოლოებისა და რიცხვების გაშიფვრა და წერილი ერთიან, გამართულ — თუმცა კი შემაძრწუნებელ — შეტყობინებად გადათარგმნეს:

იმედი მაქვს ძალიან ერთობით ჩემი დაჭერის მცდელობისას ეგ მე არ ვყოფილვარ სატელევიზიო შოუში რომელშიც ჩემზეა საუბარი მე არ მეშინია გაზის კამერის იმიტორო ის სამოთძეში გამიშვებს

I HOPE YOU ARE HAVING LOTS OF FUN IN TRYING TO CATCH ME THAT WASNT ME ON THE TV SHOW WHICH BRINGS UP A POINT ABOUT ME I AM NOT AFRAID OF THE GAS CHAMBER BECAUSE IT WILL SEND ME TO PARADICE

უცნობია, რომელ სატელევიზიო შოუს გულისხმობდა "ზოდიაქო". მკვლელი წერილში "სამოთძეზე" ("Paradice") გაუგებრად საუბარს ისევ აგრძელებს:

რაც მალე მით უკეთესი იმიტორო ახლა საკმარისი მონები მყავს რომ ჩემთვის იმუშაონ როცა სხვას ყველას არაფერი გააჩნია როცა ისინი სამოთძეს მიაღწევენ ამიტომ სიკვდილის ეშინიათ მე არ მეშინია იმიტორო ვიცი რომ ჩემი ახალი სიცოცხლე იქნება მარტივი სიცოცხლე სამოთძის სიკვდილში

ALL THE SOONER BECAUSE I NOW HAVE ENOUGH SLAVES TO WORK FOR ME WHERE EVERYONE ELSE HAS NOTHING WHEN THEY REACH PARADICE SO THEY ARE AFRAID OF DEATH I AM NOT AFRAID BECAUSE I KNOW THAT MY NEW LIFE IS LIFE WILL BE AN EASY ONE IN PARADICE DEATH

პარასკევს, 11 დეკემბერს, FBI-მ განაცხადა, რომ მათი კრიპტოანალიტიკოსების გუნდმა (CRRU-მ) კოდის გამშიფრავების ნამუშევარი დაადასტურა.

"ბოლო 51 წელიწადში CRRU-მ ხალხის შემოთავაზებული არაერთი შესაძლო ამოხსნა განიხილა და არცერთი მათგანი არ იყო სწორი. შიფრი ცოტა ხნის წინ სამი დამოუკიდებელი მოქალაქის გუნდმა ამოხსნა", — განაცხადა FBI-მ.

"ზოდიაქო" არასდროს დაუჭერიათ და საქმე ჯერ კიდევ გახსნილია. "ზოდიაქოს საქმე მიმდინარე გამოძიებაა სან-ფრანცისკოს FBI-სა და ადგილობრივი სამართალდამცავებისთვის", — განაცხადეს FBI-ს სან-ფრანცისკოს წარმომადგენლებმა.