დღეს, 11 დეკემბერს, სამხრეთკორეელი რეჟისორი კიმ კი-დუკი COVID-19-ის გამოწვეული გართულებების გამო 59 წლის ასაკში გარდაიცვალა ლატვიაში. ცნობას ლატვიის ადგილობრივი საინფორმაციო წყაროები ავრცელებენ.

რეჟისორი ამ დილის ადრეულ საათებში გარდაიცვალა ლატვიის საავადმყოფოში, სადაც მას კორონავირუსზე მკურნალობდნენ. ის ბალტიისპირეთში იმ მიზნით ჩავიდა, რომ სახლი ეყიდა და ცხოვრების უფლება მიეღო. ეს ამბავი დაადასტურა დოკუმენტური ფილმების რუსმა რეჟისორმა ვიტალი მანსკიმ, რომელიც ასევე ლატვიაში ცხოვრობს და ადგილობრივ ArtDocFest-ს უძღვება.

კიმ კი-დუკი 1960 წელს დაიბადა სამხრეთ კორეაში, ბოგვაში. ის საკმაოდ ბნელი და კონტროვერსიული არტ-ჰაუს ფილმების ავტორი იყო. ეს კონტროვერსიები პირად ცხოვრებაშიც არ აკლდა — #MeToo მოძრაობის დროს მას არაერთმა ქალმა სექსუალურ შევიწროებაში დასდო ბრალი, თუმცა კორეის სასამართლომ რეჟისორის წინააღმდეგ შეტანილი ბრალდება უარყო.

რეჟისორის დებიუტი 1996 წელს შედგა დაბალბიუჯეტიანი სურათით Crocodile, რომელმაც კორეაში კარგი შეფასება მიიღო და ევროპულ ფესტივალებზეც გაეშვა.

მისი 2000 წლის ფილმი The Isle თავისი შემზარავი ძალადობრიობითა და სიბნელით გახდა ცნობილი — იმ ნიშნებით, რომლებიც რეჟისორის ნამუშევრებში არაერთხელ გამოჩენილა — მათ შორის ფილმში იყო ცხოველებისადმი ძალადობის სცენები, რომლებიც, რეჟისორის თქმით, ნამდვილი იყო. ფილმმა დიდი რეზონანსი გამოიწვია საერთაშორისო დონეზე, განსაკუთრებით ვენეციაში, სადაც ფილმის ჩვენებისას აუდიტორიის რამდენიმე წევრს გულისრევა დაეწყო და გული წაუვიდა.

რეჟისორის ყველაზე ცნობილი ფილმია 2003 წლის სურათი Spring, Summer, Fall, Winter… and Spring, რომელიც მოგვითხრობს ბუდისტურ მონასტერზე და ხუთ ნაწილადაა დაყოფილი, მის სათაურში შემავალი სეზონების მიხედვით. 2004 წელს კიმის ფილმის Samaritan Girl პრემიერა ბერლინალეზე შედგა და ვერცხლის დათვი მოიგო, იმავე წელს კი რეჟისორის სხვა ნამუშევარმა 3-Iron ვენეციაში ვერცხლის ლომი მოიპოვა. მან წარმატებას კანის კინოფესტივალზეც მიაღწია, სადაც 2007 წელს ოქროს პალმის რტოზე წარადგინეს მისი ფილმი Breath, 2011 წელს კი მისმა დოკუმენტურმა ფილმმა Arirang ფესტივალის განსაკუთრებული ჯილდო "Prix un certain regard" დაიმსახურა. 2012 წელს რეჟისორის სურათმა Pieta ვენეციის კინოფესტივალზე ოქროს ლომიც მოიპოვა.

კიმ კი-დუკის ბოლო ნამუშევარი რუსულენოვანი სურათი Dissolve იყო, რომლის დებიუტიც კანის კინოფესტივალზე 2019 წელს შედგა.