მას შემდეგ, რაც დაანონსდა, რომ მეორე სეზონის გამოსვლამდე სერიალ ეიფორიას სპეციალურ ეპიზოდს ვიხილავდით, ერთგული მაყურებლები მოუთმენლად ელოდნენ პრემიერის თარიღს — 6 დეკემბერს, თუმცა ეს ლოდინი გაცილებით უფრო მალე დასრულდება.

2019 წელს გამოსული ამ სატელევიზიო შოუს მწარმოებელი კომპანია HBO-ა, რომელსაც ახალი სტრიმინგ სერვისი HBO Max აქვს. სწორედ ამ სერვისის მომხმარებლების წასახალისებლად ეიფორიის სპეციალური ეპიზოდის პრემიერა რამდენიმე დღით ადრე HBO Max-ზე შედგება, დაგეგმილ 6 დეკემბერს კი HBO-ზე.

ეს დეტალები ამერიკელი მაყურებლებისთვისაა მნიშვნელოვანი, თორემ ქართულმა პუბლიკამ კარგად იცის, რომ მთავარია, პრემიერა შედგეს და მის ხილვას როგორღაც მაინც შეძლებს...

ფოტო: Giphy

HBO Max-ზე სერიალის ამ სპეციალური ეპიზოდის პრემიერა დღეს, 3 დეკემებერს საღამოს 9 საათზე შედგება, რაც ქართული დროით 4 დეკემბრის დილაა.

შესაბამისად, ახალი სერიის ხილვამდე სულ რამდენიმე საათი გვაშორებს.

ფოტო: Giphy

შეგახსენებთ, რომ ეიფორიის პირველი სპეციალური ეპიზოდი მთავარი გმირის, რუს ირგვლივ განვითარდება და პირველ დეკემბერს გამოქვეყნებულმა ტრეილერმაც დაადასტურა ეს: მომავალი სერია ზუსტად იმ მონაკვეთიდან გააგრძელებს სიუჟეტურ ხაზს, სადაც სერიალის პირველი სეზონი დასრულდა.

მართალია, პირველ ეპიზოდს სულ მალე ვიხილავთ, თუმცა მეორეს შესახებ ჯერ თითქმის არაფერია ცნობილი, მათ შორის არც გამოსვლის თარიღი. თუ გავითვალისწინებთ იმას, რომ პირველი ეპიზოდის სახელწოდებაა რუ, მეორე ეპიზოდი, დიდი ალბათობით, ჯულსის თვალთახედვით მოგვითხრობს განვითარებულ მოვლენებს.