მოქალაქე დავით კილაძე ჰყვება, რომ ხაშურში პოლიციელმა მას ფიზიკური და სიტყვიერი შეურაცხყოფა მიაყენა. საქმეზე გამოძიება დაწყებულია.

დავით კილაძემ განაცხადა რომ შემთხვევა ორი დღის წინ ბაზრის მიმდებარე ტერიტორიაზე მოხდა — მას პირბადე არ ეკეთა, პატრულის თანამშრომელმა პირბადის გაკეთება მოსთხოვა და შემდეგ ფიზიკურ და სიტყვიერ შურაცხყოფაზე გადავიდა.

"მივიღე სიტყვიერი და ფიზიკური შეურაცხყოფა. მოთხოვნა ის არის, რომ დაისაჯოს სრული სიმკაცრით. ჩამოერთვას უფლებამოსილება, რათა არ დაუშავოს იგივე სხვას", — განაცხადა დავით კილაძემ.

On.ge დაუკავშირდა სახელმწიფო ინსპექტორის სამსახურს, სადაც განგვიცხადეს, რომ საქმეზე გამოძიება საქართველოს სისხლის სამართლის კოდექსის 144-ე ტერცია მუხლის მე-2 ნაწილის "ა", "ბ", "ე" და "ზ" ქვეპუნქტებით მიმდინარეობს. როგორც სახელმწიფო ინსპექტორის სამსახურში განმარტეს, ამ კონკრეტულ შემთხვევაში აღნიშნული მუხლის ქვეპუნქტები გულისხმობს, შსს-ს ცალკეული თანამშრომლების მხრიდან დაკავებულის მიმართ განხორციელებულ სავარაუდო არაადამიანური მოპყრობის ფაქტს.

საქართველოს სისხლის სამართლის კოდექსში 144-ე მუხლის მე-2 ნაწილის "ა", "ბ", "ე" და "ზ" ქვეპუნქტებით გათვალისწინებული დანაშაული გულისხმობს, დამამცირებელი ან არაადამიანური მოპყრობას, ჩადენილს მოხელის ან მასთან გათანაბრებული პირის მიერ ჯგუფურად, სამსახურებრივი მდგომარეობის გამოყენებით დამნაშავისათვის წინასწარი შეცნობით ორსული ქალის, არასრულწლოვნის, დაკავებული ან სხვაგვარად თავისუფლებაშეზღუდული, უმწეო მდგომარეობაში მყოფის ანდა დამნაშავეზე მატერიალურად ან სხვაგვარად დამოკიდებული პირის მიმართ.

სახელმწიფო ინსპექტორის სამსახურის განმარტებით, გამოკითხულია დავით კილაძე, დანიშნულია ექსპერტიზა და მიმდინარეობს სხვა საგამოძიებო მოქმედებები.