ქართული ოცნების აღმასრულებელი მდივანი, ირაკლი კობახიძე ამტკიცებს, რომ ოპოზიციის გეგმებს აღსრულების შანსი არ აქვს და შედეგი იქნება მხოლოდ ერთი — ისინი გაავრცელებენ ვირუსს.

"მათ მოახერხეს ბათუმიდან ვირუსის ექსპორტირება სხვა რაიონებში. იმავეს აპირებენ ახლა თბილისიდან სხვა რაიონებში, რაც არის კიდევ ერთი მაჩვენებელი ამ პოლიტიკური ძალის სახის. ისინი არ უფრთხილდებიან თავის მოქალაქეებს. მათ აქვთ დაგეგმილი დაახლოებით 12 000 ადამიანის შეკრება, თუმცა ჩვენი მონაცემებით, ახერხებენ ბევრად ნაკლების მობილიზებას. აქედან გამომდინარე, ბუნებრივია, მათ გეგმებს, გარდა კოვიდის გავრცელებისა, აღსრულება არ უწერია", — განაცხადა მან ბრიფინგზე.

არჩევნების შემდეგ, როცა ოპოზიციამ აქციები დაანონსა, სამთავრობო გუნდი და საკოორდინაციო საბჭოს წევრები უფრო მკაცრად აცხადებენ, რომ აქციები ვირუსის გავრცელების საფრთხეს შეიცავს და მოუწოდებენ მოქალაქეებსა და პოლიტიკურ ლიდერებს დაიცვან წესები. 8 ნოემბერს თბილისში, პარლამენტის წინ ოპოზიციას მასშტაბური აქცია აქვს დაგეგმილი.