ჩვენ უკვე შეჩვეულები ვართ, რომ კანდიდატები ნათელ მომავალს, საქართველოს განვითარებასა და პროგრესს აძლევენ ხმას, თუმცა პოლიტიკოსთა ერთი ნაწილი ირჩევს, ქარაგმების ნაცვლად პირდაპირ თქვას, რომ ხმა საკუთარ თავს მისცა.

ალეკო ელისაშვილმა საკუთარ თავს მისცა ხმა და ნომერი 24 შემოხაზა

"უკეთეს საქართველოს მივეცი ხმა და ეს ჩემი ღრმა რწმენით 24 ნომერია", — განაცხადა პარტია მოქალაქეების ლიდერმა, საბურთალოს მაჟორიტარობის კანდიდატმა ალეკო ელისაშვილმა ჟურნალისტებთან.

ზურაბ ჯაფარიძემ გირჩსა და ელენე ხოშტარიას მისცა ხმა

გირჩის ლიდერმა, ზურაბ ჯაფარიძემ პარტიებს შორის გირჩს მისცა ხმა და მაჟორიტარებს შორის კი — ევროპული საქართველოს კანდიდატს, ელენე ხოშტარიას.

"ვაკეში მაჟორიტარობის კანდიდატი არ გვყავს, ამიტომაც ხმა მივეცი ელენე ხოშტარიას. რადგან მგონია, რომ დღეს გამარჯვების ფორმულა არის ის, რომ არავის არ უნდა დაეზაროს და რაც შეიძლება ბევრი ადამიანი უნდა მივიდეს და მისცეს ხმა", — განაცხადა გირჩის ლიდერმა.

გიგი უგულავამ ასევე საკუთარ თავს მისცა ხმა

"ორიგინალური არ ვიქნები თუ ვიტყვი, რომ საკუთარი თავს მივეცი ხმა", — განაცხადა ევროპული საქართველოს ლიდერმა, გიგი უგულავამ საარჩევნო უბნიდან გამოსვლის შემდეგ.

"სერიოზულად რასაც შეეხება, ხმა მივეცი საქართველოს განვითარების გზას, მე ხმა მივეცი იმას, რომ აქ ხალხს არ ჰქონდეს უმუშევრობის, მიტოვებულობის განცდა, ზუგდიდი ამ ცვლილებებში გარდამტეხ სიტყვას იტყვის", — განაცხადა უგულავამ.

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: