მალე ტამპლიერები ნეტფლიქსის პლატფორმაზე გამოჩნდებიან.

გიგანტმა ამერიკულმა სტრიმინგ სერვისმა კომპანია Ubisoft-თან მიაღწია შეთანხმებას, რათა მათი ყველაზე ცნობილი ვიდეოთამაში Assassin's Creed (ასასინის მრწამსი) სერიალად აქციოს. The Verge-ის ცნობით, ნეტფლიქსმა მოიპოვა უფლება, რომ ამ საქვეყნოდ ცნობილი ფრენჩაიზის მიხედვით არა მხოლოდ სერიალი, არამედ ანიმაცია და ანიმეც კი გადაიღოს.

"ათ წელზე მეტი ხნის განმავლობაში მთელი მსოფლიოდან მილიონობით ფანი დაეხმარა Assassin's Creed-ის ბრენდს, რომ საკულტო ფრენჩაიზი გამხდარიყო. ახლა კი აღტაცებულები ვართ, რომ ნეტფლიქსი ამ ისტორიის შესახებ სერიალს გადაიღებს და ამავდროულად კი მოუთმენლად ველით Assassin’s Creed-ის სამყაროში მომდევნო საგის შექმნას", — განაცხადა Ubisoft-ის წარმომადგენელმა ჯეისონ ალტმენმა.

ამჟამად ნეტფლიქსი აქტიურად ეძებს იმ ადამიანს, რომელიც ამ პროექტს გაუძღვება და შოუს მთავარი შემოქმედი იქნება.

Assassin’s Creed-ის პირველი თამაში 2007 წელს გამოვიდა და მალევე ნამდვილი ჰიტი გახდა: დღემდე მისი 155 მილიონზე მეტი ეგზემპლარია გაყიდული. ამ ვიდეოთამაშის სამყარო აგებულია ასასინებისა და ტამპლიერების საიდუმლო ცხოვრებაზე, რომლებიც კაცობრიობის ისტორიის სხვადასხვა პერიოდში მნიშვნელოვან დავალებებს ართმევენ თავს: მაგალითად, არის ანტიკური საბერძნეთის, ძველი ეგვიპტისა და საფრანგეთის რევოლუციის ეპოქები.

ჯერჯერობით უცნობია, სერიალი კონკრეტულად ამ ფრენჩაიზის რომელ ნაწილს დაეყრდნობა, ვინ შეასრულებს მთავარ როლს და როდის დაიწყება გადაღებები.

აღსანიშნავია, რომ ეს პირველი შემთხვევა არ არის, როცა ამ გახმაურებული ვიდეოთამაშის მიხედვით ეკრანიზაცია იქმნება: 2016 წელს გამოვიდა ფილმი მაიკლ ფასბენდერის მონაწილეობით, რომელიც კინოგაქირავებაში არც ისე წარმატებული აღმოჩნდა, კრიტიკოსებისგან და მაყურებლებისგან კი ძირითადად უარყოფითი შეფასებები დაიმსახურა.

ნეტფლიქსმა შარშან გამოუშვა კიდევ ერთი საკულტო ვიდეოთამაშის The Witcher (მხედვარი) მიხედვით გადაღებული სერიალი, რომელშიც მთავარ როლს ჰენრი კავილი ასრულებს. პროექტი მოსალოდნელზე უფრო წარმატებული აღმოჩნდა: ის ნეტფლიქსზე ყველაზე მეტჯერ ნახეს და მისი რეკორდი ჯერ არცერთ პროექტს არ გაუუმჯობესებია.

ვნახოთ, როგორი გამოვა Assassin’s Creed-ის სატელევიზიო ეკრანიზაცია და მოახერხებს თუ არა, რომ 2016 წელს გამოსული ფილმის კრახი არ გაიმეოროს და სანაცვლოდ მხედვარის წარმატებას მიუახლოვდეს.