საპატრიარქოს საზოგადოებასთან ურთიერთობის სამსახურის ხელმძღვანელის, ანდრია ჯაღმაიძის განცხადებით, მეუფეს, რომელსაც დღეს კორონავირუსი დაუდასტურდა, მსახურება გასულ კვირას არ შეუსრულებია. ჯაღმაიძის თქმით, ამიტომ ნაკლებადაა მოსალოდნელი ამ შემთხვევას, მეუფის გარემოცვაში, გავრცელება მოჰყვეს.

"როგორც თავად მეუფემ მაცნობა, მასთან წინა კვირას ინტერვიუზე იმყოფებოდა ჟურნალისტი, რომელსაც მეორე დღეს დაუდასტურდა ვირუსი. ამის მეშემდეგ, სიფრთხილის გამო, მეუფე კონტაქტებისაგან თავს იკავებდა და იყო, ფაქტობრივად, თვითიზოლაციაში. მომდევნო დღეებში მან ჩაიტარა ტესტირება და დადასტურების შემდეგ, როგორც რეკომენდირებულია, იმყოფება იზოლაციაში, საკუთარ რეზიდენციაში", — განმარტავს ჯაღმაიძე.

ცაგერისა და ლენტეხის მიტროპოლიტ სტეფანეს Covid-19 დღეს, 26 ოქტომბერს დაუდასტურდა. როგორც მეუფე სტეფანემ On.ge-ს უთხრა, თავს კარგად გრძნობს და სიმპტომები არ აქვს.

პანდემიის დაწყებისას აქტიურად დაიწყო საუბარი როგორც ღვთისმსახურებაზე მოქალაქეების დასწრების შეზღუდვის, ისე ზიარების წესის შეცვლის შესახებ. თუმცა საქართველოს მართლმადიდებელი ეკლესიის სინოდმა ზიარების წესის ცვლილებაზე უარი თქვა და განაცხადა, რომ მოქალაქეებს ეკლესიაში სიარულს ვერ შეუზღუდავდნენ.

აღნიშნულ საკითხებზე სინოდის სხდომაც იყო მოწვეული, რომლის განჩინებითაც ზიარების წესი არ შეიცვლებოდა.