რუსეთმა ძებნა გამოაცხადა ბელარუსელ ოპოზიციონერ სვეტლანა ტიხანოვსკაიაზე, რომელიც ბელარუსში ჩატარებული არჩევნების შემდეგ იძულებული გახდა ქვეყანა დაეტოვებინა. რუსეთის სახელისუფლებო მედია ტასის ინფორმაციით, ტიხანოვსკაიას რუსეთის ტერიტორიაზე ეძებენ. სამართალდამცავ ორგანოებში მედიას განუმარტეს, რომ მასზე სახელმწიფოთაშორისი ძებნაა გამოცხადებული და არა საერთაშორისო.

ოპოზიციონერი ტიხანოვსკაია ამჟამად ლიეტუვაში იმყოფება. 6 სექტემბერს ის ანგელა მერკელს შეხვდა. რამდენიმე დღის წინ კი საფრანგეთის პრეზიდენტ ემანუელ მაკრონსაც.

ბელარუსში ჩატარებული საპრეზიდენტო არჩევნების შემდეგ ქვეყანა საპროტესტო აქციებმა მოიცვა. მოქალაქეები ალექსანდრ ლუკაშენკოს კვლავ გაპრეზიდენტებას აპროტესტებენ და არჩევნების თავიდან ჩატარებას მოითხოვენ. არჩევნების შედეგებს არ აღიარებს გაერთიანებული ოპოზიციის კანდიდატი სვეტლანა ტიხანოვსკაია, რომელიც შედეგების გამოცხადების შემდეგ იძულებული იყო, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა. საკოორდინაციო საბჭოს 7 წევრიდან 6 დაკავებულია ან ქვეყნიდან ძალდატანებით არის გაძევებული. მათ შორის მარია კოლესნიკოვა, რომელსაც ლუკაშენკოს რეჟიმი ხელისუფლების ხელში ჩაგდების მცდელობას ედავება.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ. ასევე, ბევროკავშირს მოუწოდეს, რომ ლუკაშენკოს ეკონომიკური სანქციები დაეკისროს.