ადელს კულტურის მითვისებაში მას შემდეგ დასდეს ბრალი, რაც ინგლისელმა მომღერალმა საკუთარ ინსტაგრამის ანგარიშზე ფოტო განათავსა, სადაც მას ტრადიციული აფრიკული ვარცხნილობა აქვს, ფოტოს აღწერაში კი იგი აღნიშნავს, როგორი იქნებოდა ნოტინგ-ჰილის კარნავალი წელს.

32 წლის მომღერალს, რომელიც ჩარტების ლიდერია, ფოტოში საცურაო კოსტუმი აცვია იამაიკის დროშის გამოსახულებით, ხოლო მისი თმა ბანტუს სტილშია დაწნული — ასეთი ნაწნავები კი მეტწილად აფრიკული წარმომავლობის ადამიანებთან ასოცირდება.

თუმცა, პოსტის გამოქვეყნებიდან მალევე, ადელი კრიტიკის ქარცეცხლში გაეხვა. ტვიტერის მომხმარებლებმა, მეტწილად აშშ-დან, ვარცხნილობის გამოყენების გამო მას კულტურის მითვისებაში დასდეს ბრალი.

სოციალური ქსელის ერთ-ერთი მომხმარებელი წერს: "თუკი ვფიქრობდით, რომ 2020 მეტად უცნაური ვეღარ გახდებოდა, აი, ადელი გამოჩნდა ბანტუს ნაწნავებით და კულტურის მითვისების მცდელობით, რაც არავის უთხოვია. ეს ცხადად მიუთითებს, რომ პოპ-კულტურაში მყოფი ყველა თეთრკანიანი ქალი პრობლემატურია. მეზიზღება ამის ნახვა".

კიდევ ერთი მომხმარებელი წერს: "თუ ბოლომდე ვერ იგებთ, რა არის კულტურის მითვისება, ნახეთ ადელის ინსტაგრამზე ბოლო პოსტი. უვადოთ უნდა გაუშვან ციხეში ამისთვის".

ტოტენჰემელი მომღერლის ინსტაგრამპოსტის კომენტარებში ერთ-ერთი ადამიანი აცხადებს: "ბანტუს ნაწნავები არცერთ შემთხვევაში არ უნდა გაიკეთოს თეთრკანიანმა ადამიანმა, მორჩა".

ამის საპირწონედ, ზოგიერთმა ცნობილმა ადამიანმა ადელი დაიცვა. მათ შორის იყო დევიდ ლემი, ტოტენჰემის ლეიბორისტი პარლამენტარი, რომელიც თავადაც შავკანიანია და მომღერლისადმი ბრალდებებს "სისულელე" უწოდა.

ლემი ტვიტერზე წერს: "ეს მონაჩმახი სრულიად გაუგებარია, რადგან ნოტინგ-ჰილის კარნავალის ხიბლი სწორედ უჩვეულოდ და სამასკარადოდ გამოწყობაა. ადელი ტოტენჰემში დაიბადა და გაიზარდა და ეს ყველაზე უკეთ ესმის. მადლობა, ადელ. მოძულეები დაივიწყე".

მომღერლის მეგობარმა ცნობილმა ადამიანებმა აგრეთვე მისი მხარდასაჭერი განცხადებები გააკეთეს.

ნაომი კემპბელმა, რომლის დედაც იამაიკიდანაა, ადელის ფოტოს კომენტარებში გულის და იამაიკის დროშის ემოჯიები დააკომენტარა.

კომენტარებში საკუთარი მხარდაჭერა ასევე გამოხატეს იამაიკელმა მუსიკოსმა Popcaan-მა და მსახიობმა ტესა თომპსონმა, რომელიც საი-ფაი სერიალ Westworld-ში თამაშობს.

ნოტინგ-ჰილის კარნავალი ყოველწლიური ღონისძიებაა, რომელზეც, როგორც წესი, ბრიტანულ კულტურაში შავკანიანთა წვლილი აღინიშნება, თუმცა წლეულს ეს ფესტივალი ონლაინ იმართება კორონავირუსის პანდემიის გამო.