ზუგდიდის მუნიციპალიტეტის სოფელ ორსანტიაში მდინარე ენგურზე ადგილობრივებმა დამხრჩვალი კაცი იპოვეს. სოფლის გამგებელმა, ელგუჯა ბოკუჩავამ On.ge-ს განუცხადა, რომ 65 წლის კაცი ოკუპირებული გალის რაიონის სოფელ ოქუმის მკვიდრია და ის, სავარაუდოდ, ცენტრალური ხელისუფლების მიერ კონტროლირებად ტერიტორიაზე პენსიის ასაღებად გადმოდიოდა. იგივე დაუდასტურეს On.ge-ს გალის რაიონში მცხოვრებმა ადგილობრივებმა.

შინაგან საქმეთა სამინისტრომ მომხდარზე გამოძიება სსკ-ს 115-ე მუხლით დაიწყო, რაც თვითმკვლელობამდე მიყვანას გულისხმობს. უწყების განმარტებით, კაცის ცხედარს შესაბამისი ექსპერტიზა უტარდება.

აფხაზეთის რეგიონი საქართველოში კორონავირუსის პირველი შემთხვევის დაფიქსირების პირველი დღის შემდეგ, 27 თებერვლიდან ჩაიკეტა. მას შემდეგ გალის რაიონის მცხოვრებლები გაუსაძლის ჰუმანიტარულ მდგომარეობაზე საუბრობენ. ნახევარ წელზე მეტია ისინი ნორმალურ სამედიცინო მომსახურებას მოკლებულნი არიან, გალში დარჩენილებს ქართველებს პენსიებისა და სოციალური დახმარების აღების შესაძლებლობა არ აქვთ.

ევროკავშირის სადამკვირვებლო მისიის კვლევით, ენგურის ხიდს დღეში 2 000-მდე ადამიანი კვეთს, როცა ის გახსნილია. თბილისში მომუშავე არასამთავრობო ორგანიზაციები მთავრობას კონფლიქტის ზონაში შექმნილი რთული ვითარების გამო ქმედითი ნაბიჯების გადადგმისკენ მოუწოდებენ.