საქართველოში ევროკავშირის ელჩის, კარლ ჰარცელის განცხადებით, შატილში მომხდარი ტრაგედიის გამო, თბილისში ევროკავშირის დროშა დაეშვება.

"დღეს ევროკავშირის დროშა, გასულ კვირას შატილის გზაზე ტრაგიკულად დაღუპული ადამიანების ხსოვნის პატივსაცემად დაეშვება. ჩვენ ვგლოვობთ დაღუპულთა ოჯახის წევრებთან და მათ მეგობრებთან ერთად და დაშავებულებს სწრაფ გამოჯანმრთელებას ვუსურვებთ", — წერს ტვიტერტზე კარლ ჰარცელი.

შატილის გზაზე მომხდარი ტრაგედიისას დაღუპულთა ხსოვნის პატივსაცემად, 25 აგვისტო საქართველოში გლოვის დღედ გამოცხადდა.

ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. მომხდარს 17 ადამიანის სიცოცხლე ემსხვერპლა, მძიმედ დაშავდა — 3. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.