15 აგვისტოს ფონიჭალაში მომხდარი ავტოავარიის ფაქტზე პროკურატურამ დაკავებულს ბრალი წარუდგინა. შემთხვევის შედეგად 4 ადამიანი გარდაიცვალა.

უწყების განცხადებით, ავტოავარიაში ბრალდებული მძღოლი ალკოჰოლის ზემოქმედების ქვეშ იმყოფებოდა, რის გამოც მან ვერ უზრუნველყო საგზაო მოძრაობის წესების დაცვა და გაჩერებულ ავტომანქანასა და მის უკან მყოფ ქვეითებს დაეჯახა. მათივე თქმით, მომხდარის შემდეგ მძღოლი შემთხვევის ადგილიდან მიიმალა.

უწყების ინფორმაციით, 2 ადამიანი ადგილზე გარდაიცვალა, 2 საავადმყოფოში მიყვანის შემდეგ. სხვა დაშავებულები კი სამედიცინო დაწესებულებაში მოთავსებული არიან.

სამართალდამცავებმა ბრალდებული 16 აგვისტოს დააკავეს. მას ბრალდება სისხლის სამართლის კოდექსის 276-ე მუხლის მე-9 ნაწილითა და 128-ე მუხლით წარედგინა, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას ალკოჰოლის ან ნარკოტიკის ზემოქმედების ქვეშ და განსაცდელში მიტოვებას.