მინსკში საპროტესტო აქციები განახლდა. დემონსტრანტებსა და პოლიციას შორის იყო დაპირისპირებაც.

სოციალურ ქსელებში ვრცელდებოდა ინფორმაცია, რომ პოლიცია მოქალაქეებს ჯერ კიდევ აქციის დაწყებამდე აკავებდა.

ბელარუსის KGB-ის უფროსის, ვალერი ვაკულჩიკის თქმით, სპეცსამსახურებმა საპრეზიდენტო კანდიდატ სვეტლანა ტიხანოვსკაიაზე თავდასხმა აღკვეთს. მისი თქმით, ტიხანოვსკაიას მკვლელობას აპირებდნენ.

საპროტესტო აქციის დაწყებამდე სვეტლანა ტიხონოვსკაიას შტაბში განაცხადეს, რომ ის დემონსტრაციას არ შეუერთდებოდა. როგორც მისმა პრესმდივანმა ანა კრასულინამ განმარტა, მის გამოჩენას შესაძლოა დამატებითი პროვოკაცია მოჰყვეს.

9 აგვისტოს ბელარუსში საპროტესტო გამოსვლები საპრეზიდენტო არჩევნებს მოყვა. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

ქალაქის სხვადასხვა ნაწილში, დემონსტრანტებისა და სპეცდანიშნულების რაზმის შეტაკებებს ჰქონდა ადგილი. ქვეყანაში საგანგებო მდგომარეობა ხმის მიცემის პროცედურის დამთავრებამდე რამდენიმე საათით ადრე ამოქმედდა. დედაქალაქში კი არმიის შეიარაღებული ნაწილები შევიდა. საღამოს ექვსი საათისთვის მინსკის ყველა ცენტრალურ მოედანსა და სამთავრობო შენობასთან სპეციალური კორდონი იდგა, გაჩერდა ქალაქის სატრანსპორტო სისტემა, დაიხურა ქალაქიდან შესასვლელი და გასასვლელი გზები

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავებულია, ნაწილი პოლიციამ დააკავა.

ამავე თემაზე: