სვეტლანა ტიხონოვსკაია, რომელმაც ბელარუსის საპრეზიდენტო არჩევნებში მეორე ადგილი დაიკავა, ქუჩის საპროტესტო აქციებში მონაწილეობას არ მიიღებს. როგორც მისმა პრესმდივანმა ანა კრასულინამ განმარტა, მის გამოჩენას შესაძლოა დამატებითი პროვოკაცია მოჰყვეს.

"გუნდმა გადაწყვიტა, რომ მისმა გამოჩენამ შესაძლოა გამოიწვიოს დამატებითი პროვოკაციები, რომელიც გვსურს თავიდან ავიცილოთ. ამიტომ გუნდმა მიიღო გადაწყვეტილება, რომ ის არ წავა [აქციებზე]. და ის, როგორც გუნდური მოთამაშე, გადაწყვეტილებას დაემორჩილა", — განაცხადა კრასნულინამ.

აქამდე ტიხონოსვკაიამ განაცხადა, რომ 9 აგვისტოს მინსკში აქციაზე არ გავიდა, რათა პროვოკაციის მიზეზი არ მიეცა. ამასთან, მან არჩევნებში გამარჯვებულად საკუთარი თავი გამოაცხადა. ტიხანოსვკაია ოფიციალური შედეგების გაუქმებას მოითხოვს.

9 აგვისტოს ბელარუსში საპროტესტო გამოსვლები საპრეზიდენტო არჩევნებს მოყვა. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

ქალაქის სხვადასხვა ნაწილში, დემონსტრანტებისა და სპეცდანიშნულების რაზმის შეტაკებებს ჰქონდა ადგილი. ქვეყანაში საგანგებო მდგომარეობა ხმის მიცემის პროცედურის დამთავრებამდე რამდენიმე საათით ადრე ამოქმედდა. დედაქალაქში კი არმიის შეიარაღებული ნაწილები შევიდა. საღამოს ექვსი საათისთვის მინსკის ყველა ცენტრალურ მოედანსა და სამთავრობო შენობასთან სპეციალური კორდონი იდგა, გაჩერდა ქალაქის სატრანსპორტო სისტემა, დაიხურა ქალაქიდან შესასვლელი და გასასვლელი გზები

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიების და წყლის ჭავლის გამოყენებით დაშალა. ხალხის ნაწილი დაშავებულია, ნაწილი პოლიციამ დააკავა.

ამავე თემაზე: