დღეს ქართულმა ოცნებამ კოჯორში მაჟორიტარი დეპუტატობის კანდიდატები დასახელა. "ოცნების" ძველი და ახალი სახეების წარდგენაზე საარჩევნო შტაბის უფროსმა, ირაკლი კობახიძემ იზრუნა, რომელსაც კოლეგების დასახასიათებლად ეპითეტები არ დაუშურებია. კანდიდატების დამსახურებებზე საუბრისას მან ისეთი დეტალები აღნიშნა, როგორიცაა ოჯახის წარმომავლობა, დედობა, უბნის სიყვარული და ა.შ.

პირველ კანდიდატად ჯანდაცვის ყოფილი მინისტრი, დავით სერგეენკო წარადგინეს, რომელიც "ოცნების" მაჟორიტარად საბურთალოს რაიონში იბრძოლებს. მაზე საუბრისას კობახიძემ C ჰეპატიტის ელიმინაციისა და საყოველთაო ჯანდაცვის პროგრამები გაიხსენა და დასძინა, რომ ის პარლამენტისთვის მნიშვნელოვანი შენაძენი იქნება.

კარიერული მიღწევები, წარმატებული ფეხბურთელობა და წინა ხელისუფლების პირობებში ადამიანების უფლებებისთვის ბრძოლა — ამ "დამსახურებებს" გაუსვა ხაზი კობახიძემ ნოდარ ტურძელაძის (ვაკე), ლევან კობიაშვილისა (გლდანი) და სოზარ სუბარის (სამგორი) წარდგენისას.

განსაკუთრებული ყურადღება კი დეპუტატმა ბექა ოდიშარიას და მის "ისტორიულ წარმომავლობას" დაუთმო.

"ბექა ოდიშარია არის კრწანისის ოლქის მოქმედი მაჟორიტარი, სამი თაობით მთაწმინდელი და თბილისის ამ ულამაზესი უბნის გულშემატკივარი. მე-9 მოწვევის პარლამენტში დიასპორისა და კავკასიის საკითხთა კომიტეტს წარმატებით ხელმძღვანელობდა", — აღნიშნა კობახიძემ.

ფოტო: ბექა ოდიშარია / Facebook

"ქართული ოცნების გუნდის გამორჩეული წევრი, უმაღლესი კვალიფიკაციის მქონე იურისტი" — ასე შეამკო მან ისნის რაიონის მაჟორიტარობის კანდიდატი კახი კახიშვილი.

ამის შემდეგ ჯერი კვლავ სპორტსმენზე მიდგა:

"წარმატებული ფეხბურთელი, სამი ქვეყნის ჩემპიონი, გულანთებული პატრიოტი და პრინციპული ადამიანი", — ეს მიხეილ ყავილაშვილის დახასიათებაა, რომელიც ნაძალადევის რაიონის მაჟორიტარობის კანდიდატად არის წარმოდგენილი. კობახიძემ აღნიშნა, რომ ბოლო 4 წლის განმავლობაში ქართული სპორტის მიღწევები სწორედ ყავილაშვილის დამსახურებაა, რომელიც სპორტისა და ახალგაზრდულ საქმეთა კომიტეტს ხელმძღვანელობდა.

"გამორჩეული გამოცდილების მქონე პოლიტიკოსი და დიპლომატი და უბრალოდ შესანიშნავი პიროვნება", — ამ სიტყვების ფონზე დამსწრეები ოვაციებით შეხვდნენ დიდუბისა და ჩუღურეთის რაიონის კანდიდატს, გია ვოლსკის.

ფოტო: გვანცა ნემსაძე / On.ge

საზოგადოების ყურადღება მიიპყრო იმ ფაქტმა, რომ გენდერული კვოტირების ინიციატორმა პარტიამ 30 კანდიდატიდან მხოლოდ ერთი ქალი წარადგინა პარლამენტში მაჟორიტარად კანდიდატად.

ერთადერთ მაჟორიტარ ქალ კანდიდატზე, რომელიც რუსთავისა და გარდაბნის მუნიციპალიტეტებში იბრძოლებს პარლამენტში მოსახვედრად, გავიგეთ, რომ აქვს "ხანგრძლივი მენეჯერული გამოცდილება საჯარო სამსახურში" და თბილისის საკრებულოს "აქტიური წევრია". თუმცა, სხვა მაჟორიტარობის კანდიდატებისგან განსხვავებით, ცნობილი გახდა მისი შვილების რაოდენობაც.

"და რაც განსაკუთრებით მნიშვნელოვანია, ამ ყველაფერს წარმატებით უთავსებს 4 შვილის დედობას", — თქვა პარტიის საარჩევნო შტაბის ხელმძღვანელმა მისი წარდგენისას.

ფოტო: ნინო ლაცაბიძე / Facebook

მაჟორიტარები ქართულმა ოცნებამ 30-ვე ერთმანდატიან მაჟორიტარულ ოლქში წარადგინა, აქედან 8 — თბილისში, 22 კი — რეგიონებში.

"ჩვენ მიერ წარდგენილ კანდიდატებს აერთიანებთ ერთი ნიშანი და ეს არის წარმატება, თითოეული მათგანი გამოირჩევა ცხოვრებისა და საქმიანობის წარმატებული გამოცდილებით, ამ წარმატების საფუძველია ღირსება, კეთილსინდისიერება და რაც კიდევ უფრო მნიშვნელოვანია, სამშობლოს, საკუთარი კუთხისა თუ უბნის სიყვარული", — ამ სიტყვებით დაასრულა კანდიდატების დახასიათება ირაკლი კობახიძემ.

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარუდგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციულს კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.