უმრავლესობის წევრი, ირაკლი კობახიძე ამბობს, რომ საქართველოს ყოფილი პრეზიდენტი, მიხეილ სააკაშვილი საშიშია როგორ საჭესთან, ისე უკანა სავარძელში. ასე გამოეხმაურა კობახიძე სააკაშვილის კომენტარს კითხვაზე, აპირებს თუ არა ისევ საქართველოს პრეზიდენტობას, რაზეც მან უპასუხა, რომ საჭესთან ჯდომა უყვარს.

"სააკაშვილმა საერთოდ დაკარგა აქტუალობა და მალე დაკარგავს ყველგან და ყველაფერში თავის აქტუალობას. მის განცხადებებს განსაკუთრებული მნიშვნელობა, ბუნებრივია, არ აქვს. ის არის საშიში როგორც საჭესთან, ასევე, უკანა სავარძელში. ეს კარგად იცის ქართულმა საზოგადოებამ და მას არც საჭეს მიანდობს და არც უკანა სავარძელს არასდროს", — განაცხადა კობახიძემ.

მიხეილ სააკაშვილის თქმით, ის კაბინეტისკენ არ ისწრაფვის, რადგან კაბინეტზე "ალერგია აქვს".

"კაბინეტებისკენ არ ვისწრაფვი. ახლა კაბინეტი მაქვს ზუსტად ზელენსკის თავზე და მხოლოდ ერთხელ ვიყავი, რომ მენახა რა ხდება. კაბინეტზე ალერგია მაქვს.
რა იქნება საქართველოსა და უკრაინაში განვითარებულ მოვლენებში ჩემი წვლილი, ვნახოთ. თვალს მივადევნებ მოვლენებს. არ ვაპირებ უკანა სავარძელზე ვიჯდე. მე მიყვარს საჭესთან ჯდომა, თვითმფრინავის, ფორმულას და ა.შ. ვნახოთ რა იქნება", — განაცხადა სააკაშვილმა.