მსოფლიო ბესტსელერი რომანების ავტორი კარლოს რუის საფონი 55 წლის ასაკში გარდაიცვალა.

The Guardian-ის ცნობით, ეს თანამედროვე მწერალი, რომელიც სერვანტესის შემდეგ ყველაზე პოპულარული ესპანურენოვანი წიგნების ავტორი იყო, გასულ პარასკევს ლოს-ანჯელესში, თავის სახლში გარდაიცვალა. გავრცელებული ინფორმაციით, ის ბოლო ორი წლის განმავლობაში კიბოს დიაგნოზს ებრძოდა.

კარლოს რუის საფონის შემოქმედება ორმოცზე მეტ ენაზეა თარგმნილი და მისი წიგნების 38 მილიონზე მეტი ეგზემპლარია გაყიდული. ის რვა რომანის ავტორია, მათ შორის ყველაზე პოპულარული ქარის ჩრდილი ქართულად გამომცემლობა არეტემ გასულ წელს გამოსცა.

მწერლის გარდაცვალებას გამოეხმაურა ესპანეთის პრემიერმინისტრი პედრო სანჩესი:

"მსოფლიოშიო ერთ-ერთი ყველაზე პოპულარული და პატივცემული ესპანელი მწერალი დავკარგეთ. კარლოს რუის საფონი — ჩვენი ეპოქის უმნიშვნელოვანესი ავტორი, რომელმაც თანამედროვე ლიტერატურის განვითარებაში დიდი წვლილი შეიტანა".

კარლოს რუის საფონი 1964 წელს ქალაქ ბარსელონაში დაიბადა და პირველი რომანი Prince of Mist 1993 წელს გამოაქვეყნა. 2001 წელს გამოცემულმა ქარის ჩრდილმა კი მას მსოფლიო აღიარება მოუტანა: "თუ ფიქრობთ, რომ ნამდვილი გოთიკური რომანი მე-19 საუკუნეში მოკვდა, ეს რომანი აზრს შეგაცვლევინებთ", — ასე შეაფასა სტივენ კინგმა ის.

საფონი 1990-იან წლებში ლოს-ანჯელესში გადავიდა საცხოვრებლად და უკანასკნელ წლები ძირითადად იქ გაატარა.