ფრაქცია საქართველოს პატრიოტების ლიდერმა ირმა ინაშვილმა, რომელიც მთავრობასთან შეხვედრას პარლამენტის სხდომათა დარბაზში უძღვება, კულტურის მინისტრ მიხეილ გიორგაძეს განუცხადა, რომ მან პასუხი უნდა აგოს საყდრისთან დაკავშირებით:

"თქვენთან მიმართებაში, ბატონო მიშა, ძალიან ბევრი შეკითხვები კი არ არის, უბრალოდ პირდაპირ ვამბობ, რომ პასუხი უნდა აგოთ თქვენ, კონკრეტულად საყდრისთან მიმართებაში, სადაც დანაშაული გაქვთ ჩადენილი."

ინაშვილმა მინისტრს კომპანია ისტერნ პრომოუშენის სახელმწიფო ბიუჯეტიდან დაფინანსების ფაქტიც შეახსენა:

"მე გამიხარდება, რომ ჩვენ არ გვყავდეს ისეთი მინისტრები, რომლებიც არ აზროვნებენ კერძო ინტერესების სასარგებლოდ. iPress-ის გავრცელებული ინფორმაციიდან გამოჩნდა, რომ თქვენ როცა იყავით მინისტრი, თქვენ მიერ დაფუძნებულ კომპანიას Eastern Promotion-ს, სხვადასხვა ჯაზ-ფესტივალებიდან სახელმწიფო ბიუჯეტიდან 2 მილიონზე მეტი გადაურიცხეთ. აი, ეს არის მაგალითი იმისა, როგორ არ უნდა იქცეოდეს სახელმწიფო მოხელე".