ქართული ოცნების აღმასრულებელი მდივანი, ირაკლი კობახიძე ამტკიცებს, რომ უგულავას და ოქრუაშვილის შეწყალებამდე პრეზიდენტთან კომუნიკაცია არანაირ ფორმატში არ ჰქონიათ.

"ჩვენ არ გვქონია ამასთან დაკავშირებით კომუნიკაცია პრეზიდენტთან და შევიტყვეთ ამის თაობაზე, როდესაც ჩატარდა ბრიფინგი", — თქვა მან.

კობახიძის თქმითვე, პრეზიდენტი არის დამოუკიდებელი თავისი უფლებამოსილების განხორციელებაში, მათ შორის შეწყალების ნაწილში და გამიჯნულია პოლიტიკური ხელისუფლებისგან.

"ჩვენ ბუნებრივია, ვერ ვაკადრებდით პრეზიდენტს ვერანაირი მითითების მიცემას და ასეთი რამ აზრად არ გაგვივლია", — დასძინა მან.

დღეს პრეზიდენტმა სალომე ზურაბიშვილმა გიგი უგულავა და ირაკლი ოქრუაშვილი შეიწყალა.