"არ უნდა დაგვავიწყდეს, რომ საქართველოს ბევრად მეტად სჭირდება უკრაინა, ვიდრე უკრაინას საქართველო. გასაგებია, ზომებიდან გამომდინარე", — ასე გამოეხმაურა საქართველოს ექსპრეზიდენტი და უკრაინის რეფორმების ასოციაციის ახალდანიშნული თავმჯდომარე, მიხეილ სააკაშვილი მისი დანიშვნის გამო, ქვეყნებს შორის ურთიერთობის დაძაბვას.

სააკaშვილის განცხადებით, საქართველოში სოფლის მეურნეობის პროდუქციის დიდი ნაწილი უკრაინიდან შემოდის და ასევე, ქართული პროდუქციის გასაღების მნიშვნელოვანი ბაზარია. ამიტომ, მისი თქმით, უკრაინასთან ურთიერთობების ჩრდილქვეშ დაყენება კატასტროფული იქნება საქართველოსთვის.

"საქართველო რომ გაქრეს უკრაინისთვის, უკრაინაში ხალხს ეს არ დაეტყობა. უკრაინა რომ გაქრეს საქართველოსთვის, ეს იქნება ჩვეულებრივი ცარიელი მაღაზიის დახლები, მასობრივი შიმშილი, უბედურება. ამიტომ, რა თქმა უნდა, ამაზე ლაპარაკი არ არის და უკრაინა ამას არ იზამს", — განაცხადა მან მთავარი არხის ეთერში.

აპრილის ბოლოს უკრაინის პრეზიდენტმა, ვოლოდიმირ ზელენსკიმ სააკაშვილს რეფორმების საკითხებში ვიცე-პრემიერის პოსტი შესთავაზა. ეს საკითხი ქართული ოცნებისთვის უკრაინასთან დიპლომატიური ურთიერთობის გადახედვის საბაბი გახდა. მთავრობისა და პარლამენტში მმართველი გუნდის ლიდერებმა უკრაინელ კოლეგებს უთხრეს, რომ ეს მათ შორის ნდობას შეარყევდა და კატეგორიულად მიუღებელი იყო. ერთი კვირის შემდეგ კი რადაში ხალხის მსახურის ფრაქციის ლიდერმა, დავიდ არახამიამ განაცხადა, რომ სააკაშვილისთვის მუშაობის ახალი ფორმატი იპოვეს.

რეფორმების ეროვნული საბჭო 2014 წელს მაშინდელი პრეზიდენტის, პეტრო პოროშენკოს ბრძანებით შეიქმნა. საბჭოს წევრებს პერსონალურად უკრაინის პრეზიდენტი ნიშნავს. დოიჩე ველეს ინფორმაციით, 2014-2018 წლებში საბჭომ სულ 28 სხდომა ჩაატარა. ბოლო სხდომა კი 2018 წლის მარტში გაიმართა.

საქართველოს საგარეო საქმეთა მინისტრის, დავით ზალკალიანის განცხადებით, რეფორმების აღმასრულებელი კომიტეტის თავმჯდომარის თანამდებობაზე მიხეილ სააკაშვილის დანიშვნის შემდეგ უკრაინაში საქართველოს ელჩს კონსულტაციებისთვის გამოიძახებენ.

პრემიერმინისტრი, გიორგი გახრია ამბობს, რომ უკრაიდან ელჩის კონსლუტაციებისთვის გამოწვევა იმას არ ნიშნავს, რომ ორ ქვეყანას შორის დიპლომატიური ურთიერთობები და სტრატეგიული პარტნიორობა კითხვის ნიშნის ქვეშ დადგება.

მისი თქმით, ელჩის გამოწვევის მიზანი მასთან კონსულტაციების გავლაა იმასთან დაკავშირებით, თუ როგორ დაიცვან ქვეყნებს შორის ურთიერთობები ავანტიურისტი პოლიტიკოსებისგან.