საქართველოს ექსპრეზიდენტი და უკრაინის რეფორმების ასოციაციის ახალდანიშნული თავმჯდომარე, მიხეილ სააკააშვილი აცხადებს, რომ არ აინტერესებს რას ფიქრობენ "რუსეთის შნირები". ასე გამოეხმაურა ის მთავარი არხის ეთერში უკრაინაში თანამდებობაზე დანიშვნის გამო დაწყებულ კრიტიკას.

სააკაშვილმა დააკონკრეტა, რომ ქართული ოცნების ლიდერს არ გულისხმობს და ბიძინა ივანიშვილი შეურაცხმყოფელ კონტექსტში მოიხსენია. მისი თქმით, ის "სერიოზულ მოთამაშეებს", კონკრეტულად კი რუსეთს გულისხმობს.

"რუსეთისთვის ეს იყო ძალიან პრინციპული საკითხი. რუსეთის "შნირებმა" რა ილაპარაკეს ამას მნიშვნელობა არ აქვს. რუსეთისთვის ეს იყო ნათელი დემონსტრირება, რომ უკრაინა არის დამოუკიდებელი ქვეყანა და მისი პრეზიდენტი არის დამოუკიდებელი ქვეყნის ღირსებით აღსავსე პრეზიდენტი. არ მინდა, რომ განხეთქილების ვაშლი ვიყო, მაგრამ ამის დემონსტრირება და შეხსენება პერიოდულად საჭიროა რუსეთისა და საერთაშორისო თანამეგობრობისთვის", — განაცხადა მან.

აპრილის ბოლოს უკრაინის პრეზიდენტმა, ვოლოდიმირ ზელენსკიმ სააკაშვილს რეფორმების საკითხებში ვიცე-პრემიერის პოსტი შესთავაზა. ეს საკითხი ქართული ოცნებისთვის უკრაინასთან დიპლომატიური ურთიერთობის გადახედვის საბაბი გახდა. მთავრობისა და პარლამენტში მმართველი გუნდის ლიდერებმა უკრაინელ კოლეგებს უთხრეს, რომ ეს მათ შორის ნდობას შეარყევდა და კატეგორიულად მიუღებელი იყო. ერთი კვირის შემდეგ კი რადაში ხალხის მსახურის ფრაქციის ლიდერმა, დავიდ არახამიამ განაცხადა, რომ სააკაშვილისთვის მუშაობის ახალი ფორმატი იპოვეს.

რეფორმების ეროვნული საბჭო 2014 წელს მაშინდელი პრეზიდენტის, პეტრო პოროშენკოს ბრძანებით შეიქმნა. საბჭოს წევრებს პერსონალურად უკრაინის პრეზიდენტი ნიშნავს. დოიჩე ველეს ინფორმაციით, 2014-2018 წლებში საბჭომ სულ 28 სხდომა ჩაატარა. ბოლო სხდომა კი 2018 წლის მარტში გაიმართა.

საქართველოს საგარეო საქმეთა მინისტრის, დავით ზალკალიანის განცხადებით, რეფორმების აღმასრულებელი კომიტეტის თავმჯდომარის თანამდებობაზე მიხეილ სააკაშვილის დანიშვნის შემდეგ უკრაინაში საქართველოს ელჩს კონსულტაციებისთვის გამოიძახებენ.

პრემიერმინისტრი, გიორგი გახრია ამბობს, რომ უკრაიდან ელჩის კონსლუტაციებისთვის გამოწვევა იმას არ ნიშნავს, რომ ორ ქვეყანას შორის დიპლომატიური ურთიერთობები და სტრატეგიული პარტნიორობა კითხვის ნიშნის ქვეშ დადგება.

მისი თქმით, ელჩის გამოწვევის მიზანი მასთან კონსულტაციების გავლაა იმასთან დაკავშირებით, თუ როგორ დაიცვან ქვეყნებს შორის ურთიერთობები ავანტიურისტი პოლიტიკოსებისგან.