პირველი საუნივერსიტეტო კლინიკის დირექტორი, ლევან რატიანი ამბობს, რომ დღეს კორონავირუსით ინფიცირებული ხუთი პაციენტის გამოჯანმრთელებას ელიან, მათგან ერთი ორსულია. როგორც რატიანი განმარტავს, ორსული 24 კვირაშია და გუშინ კორონავირუსის ტესტზე მას უარყოფითი პასუხი ჰქონდა. ]

სულ კლინიკაში ორი ორსული ქალია და მათი მდგომარეობა სტაბილურია.

რაც შეეხება დანარჩენ პაციენტებს, კლინიკაში მყოფი 57 პაციენტიდან, რვა რეანიმაციაში. სამი ადამიანი ფილტვის ხელოვნურ ვენტილაციაზეა, მათგან ერთის მდგომარეობა კი კრიტიკულია.

"კლინიკურად სახეზეა მწვავე ფილტვის დაზიანების სინდრომი, მწვავე გულის დაზიანების სინდრომი, მწვავე თირკმლის დაზიანების სინდრომი, მწვავე ღვიძლის დაზიანების სინდრომი, რაც მიუთითებს, რომ არის მულტიორგანული უკმარისობა, ტარდება რეანიმაციული ღონისძიებები და ვნახოთ, რა შედეგს მივიღებთ", — აღნიშნა რატიანმა.

ბოლო მონაცემებით, ქვეყანაში ვირუსის 236 დადასტურებული შემთხვევაა. ამათგან სამი უცხოეთში დადასტურდა და საქართველოს მოქალაქეები სამკურნალოდ ქვეყანაში დაბრუნდნენ. კორონავირუსისგან კიდევ ორი პაციენტი გამოჯანმრთელდა, სულ 56 ადამიანი. COVID-19-ის შედეგად სამი ადამიანი გარდაიცვალა.

10 აპრილს კორონავირუსის შიდა გავრცელების გამო ლენტეხის რაიონში სრული კარანტინი გამოცხადდა. მთავრობის ადმინისტრაციის პრესსპიკერის, ირაკლი ჩიქოვანის განცხადებით, ლენტეხში შიდა გადაცემის ოთხი ახალი ფაქტი დაფიქსირდა.

მისივე თქმით, ეპიდემიოლოგების რეკომენდაციით, ლენტეხთან ამოქმედდება იგივე შეზღუდვები, რაც დაწესებულია მარნეულისა და ბოლნისის რაიონებში — აკრძალულია ლენტეხში შესვლა და გამოსვლა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: