ამერიკელი მომღერალი სტივი უონდერი მიიჩნევს, რომ დონალდ ტრამპისთვის ხმის მიცემა იგივეა, რომ მას მანქანის მართვა სთხოვო. ჰაფინგტონპოსტის ცნობით, ამაზე მან ჰილარის კამპანიისთვის მიძღვნილი კონცერტის შემდეგ განაცხადა:

"გადაუდებელი სიტუაცია რომ შეგექმნას და სასწრაფოდ გჭირდებოდეს საავადმყოფომდე მისვლა, ისურვებდი, რომ შენი მანქანა ამ დროს მე მემართა? არა, რადგან მე გამოცდილი მძღოლი არ ვარ, ხომ ასეა?"

66 წლის მუსიკოსი მიიჩნევს, რომ კლინტონი ტრამპზე უკეთესი კანდიდატია ამერიკის პრეზიდენტობისთვის:

"ჰილარი პოლიტიკაში გამოცდილი პიროვნებაა და მან 30 წელი ქვეყნისთვის იმსახურა. აღარაფერს ვიტყვი იმაზე, რომ მას მშობლებმა სხვა ადამიანების სიყვარული და პატივისცემა ასწავლეს. ჰილარი ის ადამიანია, ვისი ნახვაც მსურს ამერიკის მმართველობის სათავეში".

უონდერმა, რომელიც გრემის ჯილდოს მფლობელი 25-ჯერ გახდა, დასძინა, რომ მისი სიცოცხლის ბოლო წლები პესიმიზმით სავსე იქნება, ტრამპის პრეზიდენტობის შემთხვევაში. მან რესპუბლიკელების პრეზიდენტობის კანდიდატი ქალების და მუსლიმების მიმართ დისკრიმინაციული განცხადებების გამოც გააკრიტიკა:

"ეს რეალითი შოუ არაა, ეს რეალური ცხოვრებაა. მე კლინტონს ვუჭერ მხარს, რადგან მე მჯერა იმის, სადაც ვართ და საით მივდივართ. მე ყოველთვის მჯეროდა, რომ ამერიკა დიდებული ქვეყანაა და ჩვენ მას უფრო უკეთესს ვხდით".

ამერიკის შეერთებულ შტატებში საპრეზიდენტო არჩევნები დღეს, 8 ნოემბერს, იმართება. გაიგეთ როგორ ირჩევენ პრეზიდენტს ამერიკაში: საარჩევნო სისტემის დეტალები.