2015 წელს დიდ ბრიტანეთში შექმნილმა ფემინისტურმა პოლიტიკურმა გაერთიანებამ — ქალთა თანასწორობის პარტია — ოქსფორდის უნივერსიტეტის გამომცემლობას ღია წერილით მიმართა და ოქსფორდის ინგლისური ენის ლექსიკონში სიტყვა "ქალის" განმარტებიდან "სექსისტური" განსაზღვრებების ამოღება მოსთხოვა.

წერილში აღნიშნულია, რომ ლექსიკონში სიტყვა "ქალის" სინონიმად მოყვანილია ისეთი განსაზღვრებები, როგორებიცაა "ძუკნა" (bitch) და "შინაბერა, მოახლე" (maid). სანაცვლოდ სიტყვა "კაცის" განმარტებაში კი ვკითხულობთ: "მამრობით სქესთან დაკავშირებული ისეთი ნიშან-თვისებების მქონე პიროვნება, როგორებიცაა სიმამაცე და სიმტკიცე".

"ძუკნა ქალის სინონიმი არ არის. ამ სიტყვის დაძახება ქალს ადამიანურ ღირსებას ულახავს. ეს არის ყოველდღიური სექსიზმის გამოხატულება, რომელიც ქალებს ზიანს აყენებს და ეს ლექსიკონში მკაფიოდ უნდა იყოს განმარტებული", — ვკითხულობთ წერილში, რომლითაც ოქსფორდის უნივერსიტეტის გამომცემლობას ლექსიკონში ცვლილებების შეტანას სთხოვენ.

ამ საკითხთან დაკავშირებით მარია ჯიონავარდიას ინიციატივით ონლაინ პეტიციაც შეიქმნა, რომელსაც ამჟამად 32 ათასზე მეტი ხელმომწერი ჰყავს.

ოქსფორდის ინგლისური ენის ლექსიკონი ერთ-ერთი ყველაზე ცნობილი ლიცენზირებული ლექსიკონია, რომელსაც ისეთი გავლენიანი კომპანიები იყენებენ, როგორებიცაა Apple და Google.

"ეს ყოველდღიურ სექსიზმს ან პატრიარქატს ვერ დაასრულებს, მაგრამ მაინც კარგი დასაწყისია. ამ ლექსიკონშია მოყვანილი სინონიმები და მაგალითები კონტექსტის გარეშე ქალების მიმართ ნეგატიურ სტერეოტიპებს ამყარებს. ეს კი ზიანის მომტანია, რადგან ენა გამოხატავს სამყაროში არსებულ დამოკიდებულებებს, განსაზღვრავს შემდგომ აღქმას და გავლენას ახდენს იმაზე, თუ როგორ მოექცევიან და აღიქვამენ ქალებს", — ვკითხულობთ წერილში, რომელსაც ხელს ლინგვისტები და უნივერსიტეტის პროფესორებიც აწერენ.

ამ საკითხზე განმარტება გააკეთა ოქსფორდის უნივერსიტეტის გამომცემლობის წარმომადგენელმაც:

"ჩვენი ლექსიკონები უფრო ასახავს იმას, თუ როგორ გამოიყენება ენა, ვიდრე ახალ დანიშნულებას აძლევს მას. მათში თითოეული სიტყვა უკლებლივ იმის მიხედვითაა მოყვანილი, თუ როგორ იყენებენ ინგლისურ ენას ადამიანები ყოველდღიურ ცხოვრებაში. იმ შემთხვევაში, როცა კონკრეტული განმარტებები შეიძლება შეიცავდეს დამამცირებელ მნიშვნელობებს, მათ ამის განმსაზღვრელი ნიშანი აუცილებლად აქვთ მინიჭებული."