რუსეთში, ტიუმენის მხარის მოსახლეობამ, ამავე მხარის გუბერნატორს, ვლადიმერ იაკუშევს წერილი მისწერა. მათი მთავარი მოთხოვნა საკულტო ნაწარმოების, როკ ოპერა "იესო ქრისტე – სუპერვარსკვლავის" ჩვენების აკრძალვაა.

როგორც სააგენტო ტასი იტყობინება, წერილის ავტორთა თქმით, როკ ოპერის მთავარ მიზანს წარმოადგენს, დაამკვიდროს მცდარი წარმოდგენები იესო ქრისტეს "ღვთაებრივ არსზე". აკრძალვის მომხრეები, გუბერნატორის გარდა, ასევე მიმართავენ პროკურორსა და საკონცერტო–თეატრალური გაერთიანების ხელმძღვანელს.

როგორც გუბერნატორის პრესსპიკერმა განაცხადა, როკ–ოპერის აკრძალვის შესახებ გადაწყვეტილება უნდა მიიღოს სწორედ საკონცერტო–თეატრალურმა გაერთიანებამ, რომლის წევრიცაა ტიუმენის ფილარმონია.

ოქტომბრის შუა რიცხვებში "იესო ქრისტე – სუპერვარსკვლავის" ჩვენება უკვე აკრძალეს ომსკში, ორგანიზაცია ოჯახი, სიყვარული, სამშობლოს მოთხოვნით.

როკ ოპერა 1971 წელს, ბროდვეის სცენაზე დადგეს ენდრიუ ლოიდ ვებერმა და ტიმ რაისმა, მიუზიკლის ეკრანიზაცია კი 1973 წელს გადაიღეს.